【一嚟就單打獨鬥 _ _ _ _？】Candide贏出第一屆中京2歲錦標

競馬知舍
9月4日
讀畢需時 2 分鐘

日本戰報下半場，同大家睇吓2歲戰線。

先睇星期日中京一場三級賽，因應今年賽期大改，原先嘅小倉2歲錦標調入中京，路程轉跑1400米，改埋名中京2歲錦標，賽事亦由第1屆重新計算；今場大熱落喺上場未勝利賽大勝7個馬位嘅Star Anise (松山弘平) 身上，直路率先突圍，不過仲有Candide (北村友一) 黃雀在後，兩駒鬥足最後200米，北村出盡九牛二虎之力，最後一步先將對手擒下，更以1:19.4打破場地紀錄，精彩！

知舍POG今期有3駒報捷，不過睇之前先同大家報一則大船變鐵達尼嘅消息。星期六新潟新馬1400米，出自父系「神威啟示」、一哩馬后「放聲歡呼」第一胎 Gran Maestro (李慕華) 生涯初出，亦係今屆POG比賽第二多人揀嘅馬，有23個人叫糊，頭段跟住馬群中間左右，明顯冇跑錯，不過直路跑落去一步都冇；Mitsukane Venera (津村明秀) 喺末段擒下放頭嘅Masticare (三浦皇成)，打開勝門，相當出色。

同日中京未勝利2000米，掛吉田照哉牌頭、社台共有馬Cara Persona (吉村誠之助)，早前初出落第，如今匆匆再出，順利補中，幫慧敏及彭國年賺560分；同場另一匹POG、「雪嶺熱點」半弟Cervara就比北村友一發揮半天吊累事，早段留到包尾，去到對面直路見唔對路踩油，點知踩得一半，變咗走四疊兜大圈，末段趁對手腳軟先收返個第3，幫7個人賺140分，不過賽後驗到骨折，起碼抖半年，比賽時段幾乎報銷。

星期日札幌新馬1800米，呢組明顯鞍上人成為勝負分野，睇吓22年獵豹錦標冠軍Kafuji Octagon半弟、「樸素無華」馬主池谷誠一喺24年Select Sale以4700萬買入嘅Elliptic Curve (橫山武史)，再對比18蚊大熱、「ぐりぐり君」名下Nettaiya Rai (古川奈穗)，沿途走勢就唔再複述，睇佢兩個直路點發揮，邊個有心搏命想贏馬？高下立見啦！前者成功幫美女敏賺750分。

同日另一場新潟新馬1800米，「里見騰輝」半妹、社台共有馬Garofano (戶崎圭太)，早段略為脫節，直路走入馬群中間推進，對住絲綢會一口馬Tassel Knot (李慕華)，快佢一步攝到空檔，率先突圍，後者搵到位再衝一段，都為時已晚，以半個馬位取勝，幫Karl賺750分，Tassel Knot就幫山大賺300分。