【一注獨中賺千一分】Arbanne攻下藏紅花賞

競馬知舍
10月2日
讀畢需時 2 分鐘

日本戰報第二節，再同大家睇POG戰況。

睇之前先追加星期四晚船橋3歲馬女限定1800米大海盃 (日本三級賽/藍冊表列賽)，地方馬贏返一次，主隊馬Proud Fleur報返6月關東橡樹對Memoria Cafe (李慕華) 一敗之仇，張田昂全程主宰步速，等到全場對手跟到腳軟之際，直路再踩一段，Memoria Cafe同Promised Gene (戶崎圭太) 一對追到氣咳都冇用，埋單贏3個馬位，拎走JBC雌馬經典賽出賽資格。

POG比賽組有3駒報捷，首先係星期六中山新馬1600米，2匹POG同場上陣，結果一Q返嚟，蘿蔔會一口馬Ghillies' Ball (李慕華)，由馬群大約中後疊，直路抄出大外檔逐步湧上，末段輕鬆將Lilas (三浦皇成) 擒下，幫Pisa賺750分，後駒就幫Yan賺300分。

星期日中山新馬2000米，睇吓同馬后「杏目」同一母線、絲綢會一口馬Epic Flight (莫雷拉)，早段喺大約第5位左右，入直路轉出四疊發力，率先突圍，任你Cal Knight (李慕華) 追足一條直路，都難越雷池半步，開出2:01.2，亦係9月中山同程新馬賽中最快時間，表現出色，幫K3賺750分。

同日稍後中山就有馬女限定1勝1600米藏紅花賞，要不是今年短途馬錦標係轉播單場而非賽日，呢組馬相信會更多人留意，8匹出賽馬入面POG同安全車各佔一半，上場喺新潟補中嘅Arbanne (李慕華) 嚟到呢組再下一城，沿途留守第5位，直路上同Beret Basque (丹內祐次) 單打獨鬥，順利反先，以1 1/4馬位取勝，幫慧敏賺1110分；大熱門落喺良血馬Dream Core (莫雷拉) 身上，不過今仗表現一般，直路彎見到鞍上人又鞭又推，都知敗局已定，末段對住頭二馬，都埋唔到身，只能保住一席第3，連同終點前追回一席第4嘅Rouge Cardea (橫山典弘)，都各自為POG揀咗嘅人賺分。

9月賽事全部結束，知舍POG戰況請睇留言。