【七，全部都係七】唔係7歲馬就係7號馬贏

競馬知舍
9月9日
讀畢需時 2 分鐘

秋季賽期開始，日本戰報上半場先同大家睇古馬戰線。

星期六中山上演1600米三級賽京成盃秋季讓賽，連續兩日都有7歲馬建功，以為年初先由中央轉會南關東嘅「宙斯山洞」喺韓國盃擒下「禪勝輝煌」夠癲？2025年第三季見到「大震撼」仔女贏重賞仲癲，睇吓馬女「好靈巧」(Ho O Las Cases，木幡巧也/#1)，三年前亮相轉播場合不敵「俊彥茶座」，去到今年先從3勝班畢業，升班只係第三場，表現突然神勇，直路沿住內欄殺上去，門前反先「點滴耀彩」(松若風馬/#3)，加埋「對比平衡」(丸山元氣/#7)，構成一條93萬日圓三重彩；夏季一哩系列三關頭馬都只跑一場，剩低嘅白鷺錦標盟主Keep Calm跑多一場有第5都夠贏冠軍。

場外消息一則，爆笑問題成員田中裕二本來想買紫苑錦標三重彩「7>1,3,4,5,6,11」，每注200日圓，點知撳漏「前日發售」，變咗買呢場，結果開出咗。佢做完節目先發現自己撳錯飛，想行去自助投注機派彩，又因為銀碼大得滯派唔到，要去櫃檯收返186萬日圓。 (今次兩場中山賽事特登打埋馬號，佢真正想買嘅又中唔中？睇埋下面就知。)

星期日阪神上演1200米二級賽人馬錦標，講之前叉開少少，先講香港場特首盃，馬王「嘉應高昇」雨中輕取，珠峰一戰恐怕係得Private Harry阻到佢，再睇準備去日本嘅「金鑽貴人」，叫做追得唔錯，不過Tony睇完一句概括晒：「迴光返照，一定係迴光返照」；講返人馬錦標，川田將雅今場有「大海女神」唔要，轉騎「五雪峰」，結果冇揀錯，直路一口氣橫掃全場，換咗岩田望來嘅「大海女神」同「濠城」(橫山武史) 都交返應有水準。夏季短途系列由北海道跑兩場得1冠1第4嘅Invincible Papa奪冠，今場憑「竹園飛劍」跑第4嘅松若風馬就以1W3Q嘅成績贏出夏季騎師賽。

秋季賽事開始，亦意味三冠預賽重燃戰火，中山3歲馬女限定2000米二級賽紫苑錦標，13匹馬爭3席，Kelly Fled Ask (西塚洸二/#7) 放足二千，一步不蝕，末段力拒「樂透心」全妹Jocelyn (李慕華/#5) 來犯取勝，最後一席就由Danon Fair Lady (戶崎圭太/#9) 拎走；櫻花賞季軍Lynx Tip (北村友一/#1) 今仗捧成大熱，全程一步都冇，秋華賞條路似乎亮起黃燈。