top of page
搜尋

【三出三捷】「塔狀高雲」捧走京都新聞盃

  • 作家相片: 競馬知舍
    競馬知舍
  • 5月13日
  • 讀畢需時 2 分鐘

返嚟日本戰報，直接睇4場賽事。


星期六京都上演3歲限定2200米二級賽京都新聞盃，5匹POG為咗出線打吡作最後努力，馬后「創世駒」之子Bereshit (北村友一) 排15檔起步焗住擺前走，直路初段率先突圍，但係跑到最後二百左右少少腳軟內閃，比「塔狀高雲」(西村淳也) 有機可乘，最後幾步推騎相當兇狠，去到門前奠定勝局，雙雙憑獎金出線，後駒出道3戰全勝，相信到正賽會係「洛夫琴山」最大對手 (「天狼煌煌」長力看似不足)。Bereshit回師東京表現應該更好，三甲不作他選，不過贏唔贏到就要睇鞍上人臨場發揮。今場表現失望要數到5.9億身價嘅M’s Begin (川田將雅)，早段跑落搶口，敗象早呈，結果前五不入，想跑打吡都要指望有對手退出。講返知舍POG，「塔狀高雲」一下子幫Ivy仔賺5400分，Bereshit就幫15位朋友賺2200分。

 

同日東京由年長馬出戰1800三級賽葉森盃，櫻花賞盟主「橡木城」(戶崎圭太) 早前喺中山牝馬錦標 (三級賽) 作轉倉首戰，對住一班馬女，負重磅下只係跑近，事隔兩個月，轉對一眾雄馬，又有迴光反照，喺直路一度出頭，幾乎得手之際，臨門先比「詩歌遊子」(李慕華) 擒下；後駒跑親三級賽相當醒神，李慕華喺呢組算揀啱座騎，只係稍後可以比佢發揮嘅地方亦唔多，上到一級賽，亦只係陪跑份子而已。

 

知舍POG比賽組仲有2駒報捷，先係星期六京都未勝利泥地1800米，留意Kokorozuyosa (濱中俊)，先前三戰草地，最好成績只係第5，今仗初跑泥地，由早段一度落後前排大約10個馬位之下，逐步收復失地，一來一回倒贏5個馬位，幫手影賺590分。

 

另一組星期日東京轉播賽日之前一組未勝利1600米，睇吓前田家名下Ironclad (三浦皇成)，先前出道兩戰泥地都輸得好遠，今場增程轉跑草地，早段留守馬群中後疊位置，末段沿中檔排眾而上，爆出90倍冷門，幫K3賺590分。

 

Photo: 賽事截圖


==============================

Telegram公海：https://t.me/GoldRacing

 
 
 

留言

bottom of page