【上年第二今年坐正】「越野跑」捧走天鵝錦標

競馬知舍
10月15日
讀畢需時 2 分鐘

返嚟日本戰報，今期跑三日馬，先睇古馬組戰況。

先睇星期日1800米馬女限定二級賽愛爾蘭錦標，先前講過今年重賞調整，今場同府中牝馬錦標分家，前者獨立成為新賽事，由第1屆開始計起；兩大熱門沉船收場，「驍智嬌娃」換上李慕華一樣變弱智，「愛祭典」(武豊) 走勢唔穩定，放足四段，去到最後二百左右腳軟；上年秋華賞第4、今年先後喺兩場重賞上名嘅「艷紫芳馨」(岩田望來)，上仗終於贏馬升班，今場形勢啱佢發揮，由早段留守馬群中間位置，直路從大外檔一湧而上，門前將Angola Black (戶崎圭太)、「神寶帶」(佐佐木大輔) 一網打盡，首勝重賞。

星期一係日本公眾假期，京都上演1400米二級賽天鵝錦標，新勝升班嘅World's End 比戶崎圭太段段快放，邊個跟佢就死邊個，連「出奇致勝」(松山弘平) 戰至最後幾步都要跌埋個第3出去比「撥亂飛槍」(吉村誠之助)；再睇吓「越野跑」(菅原明良) 同「麗圖小鎮」(北村友一)，大家都喺馬群中後疊，轉入直路一內一外，逐步收復失地，「越野跑」推落去幾好反應，終點前力壓「麗圖小鎮」，以1:18.9打破場地紀錄；「麗圖小鎮」跑返首本千四就上名，年尾出戰阪神盃，亦不容忽視。

知舍POG古馬組有6駒報捷，今期睇其中3場，先講星期日東京3歲以上1勝2400米，上屆大船、「杏目」第一胎Aaron's Rod (李慕華)，年頭脫離未勝利行列，轉眼就受傷緣盡大賽，今仗事隔8個月之後復出，贏得相當驚險，直路沿馬群中間突圍，外檔一對Norari Kurari (丹內祐次)、Timur (三浦皇成) 步步進迫，三駒一齊衝線，險勝一個頭位。

ChatGPT就有2匹參戰馬升上公開班，先係星期六京都3歲以上3勝1600米，睇吓Buena Onda (川田將雅)，由直路彎開始比「入場劵」(和田龍二) 一路頂出外疊，蝕位唔少，六七疊入直路，川田不慌不忙擺正堂軚再追，去到門前及時將後者擒下，表現出色。

https://jra.webcdn.stream.ne.jp/web/jra/onetag2020/eqPcPlayer2.html?target=202503080410

星期一東京3歲以上3勝2400米，社台團體出一對，一匹就係Shining Sword (西村淳也)，另一匹早前轉播見過嘅「兩面勝場」(大野拓彌)，基本上佢兩個熱晒，大家沿途都留喺二疊前後腳咁跑，直路上大家鬥衝一段，明顯Shining Sword反應好過「兩面勝場」好多，一望空撲上去，走勢強勁，最後100米控制大局，Endono Hana (津村明秀) 後上第2，「兩面勝場」連第3都爭啲冇埋，幾經辛苦先過到Speed Rich (橫山武史)；Shining Sword 出道9戰未失三甲，表現十分準繩，稍後升班仍可留意。