【中山馬后】「蕾麗宮」產經賞全面復活

競馬知舍
9月24日
讀畢需時 2 分鐘

返嚟日本戰報，先睇古馬組賽事。

首先睇星期日阪神3歲限定二級賽2400米神戶新聞盃，賽前都係預三大熱門包辦三張菊花賞入場劵，爭在三重彩點樣排，「投擊俱佳」(坂井瑠星) 直路率先突圍，諗住贏得嘅時候，冷不防「艾里王」(川田將雅) 黃雀在後，末段開個32.6秒出嚟，終點前及時趕到，「神之禮」(松山弘平) 就追回一席第3。「艾里王」呢匹POG大船今仗終於交回應有水準，不過去到菊花賞，最大疑問應該係川田，始終個人出戰大長途表現差一皮；「投擊俱佳」睇血統好似唔到三千，正賽機會較次。

中山上演二級賽2200米產經賞，講到同母子嗣喺重賞場合包Q，香港就有大逃兄弟「馬克羅斯」、「歡樂之光」，日本平地重賞就要等到今時今日先有第一次 (跳欄重賞有試過)，有馬紀念盟主「蕾麗宮」(戶崎圭太) 年頭因為骨折休息，等到6月喺寶塚紀念復出，又跑到報失，正當大家以為隻馬係咪高峰已過嘅時候，返嚟中山一轉，即刻變「梵高藝展」2.0，早段守住馬群後列，跑過半程見阿哥Douradores (李慕華) 中段發力，佢又跟住走埋一份，入到直路兄妹對決，戶崎一擺正堂軚，三兩個箭步輕鬆反先，造出2:10.2亦比紀錄慢一線；之前有指「蕾麗宮」考慮來港遠征，幕後跑完今場打消念頭，秋季部署兩仗，最大目標都係年尾衛冕有馬紀念。

精選賽事睇星期六中山3歲以上2勝2500米九十九里特別，3歲馬用呢場上菊花賞時有發生，不過只有「密州怨曲」一駒能夠贏到，今年又有一匹馬可以留意，就係「摩天」系寺田家名下嘅My Universe，橫山典弘今場採取大逃跑法，Homan睇到佢用呢啲跑法差啲PTSD，好在一放到底，以7個馬位大勝，幕後隨即放眼菊花賞，到時有力搞亂檔。