【你估贏完唔使付出代價】Firostefani捧走阿堤密斯錦標

競馬知舍
10月30日
讀畢需時 3 分鐘

返嚟日本戰報，睇完菊花賞，再同大家睇2歲戰線。

先睇星期六東京馬女限定1600米三級賽阿堤密斯錦標，兩匹良血POG大戰，白毛馬Marga (武豊) 對「初日高升」半妹Firostefani (川田將雅)，前者快放三段，直路企晒喺度，反而後者同阿哥「初日高升」一樣，遇水即生，沿途跟住第三位，直路自動波湧上去，末段一出正腳，稍稍彈甩對手，以1 3/4馬位取勝，幫6個人賺2900分；不過賽後傳來壞消息，Firostefani賽後證實右前腳屈腱炎，睇嚟下年出戰三冠機會危危乎。

除咗阿堤密斯錦標之外，知舍POG比賽組仲有1駒報捷，星期日京都表列1800米萩錦標，Sunday會一口馬Badrinath (坂井瑠星)，沿途坐住Boxseat，直路上率先突圍，最後100米奠定勝局，幫Ozil同MKC賺1700分；反而亞軍Kikko Bello (川田將雅) 更值得一提，交出全場最快末段，直路追勢凌厲，一度以為威脅到Badrinath，埋單所負不遠，下場出戰黃菊賞，睇吓去到轉播場合能否補中。

轉睇POG負方組，名門友道康夫馬房今年有一對「北部玄駒」子嗣，未出道都已經受注目，一匹拍賣會天價貨，一匹血統同香港馬圈有關連，兩駒今個星期分途初出，結果一齊做阿二。先講星期六東京新馬2000米，Sunday會一口馬、近親包括香港馬王「爪皇凌雨」嘅Black Olympia (川田將雅)，亦係今屆POG大船之一，有成20個人揀；一落到場，基本上推足大半程，轉入直路，川田都有少少進退失據，有出面空檔唔要，轉走入面，直追Sunday會另一匹參戰馬、沿途放得幾順暢嘅Up Helly Aa (李慕華)，去到最後50米左右已經捉到，大家叮噹馬頭，李慕華最後一步推返落去，影相影贏埋，成功擊沉大船，幫20個人賺300分。

星期日京都新馬1800米，日本拍賣會史上第二高價馬，M S Racing杉野公彥名下、2024年Select Sale週歲價5億9000萬日圓 (約366萬美元/2858萬港元) 買入嘅M’s Begin (李慕華)，Tony私下同人講，比起POG揀咗嘅Danon History、Coney Island，對呢匹M’s Begin期望更大，睇法同早年同馬房嘅標王「頌讚角宿」相近，按理半場都唔應該輸，捧到14蚊大熱落場，偏偏就輸得出嚟，沿途跑落相當搶口，轉入直路初段，仲落後緊用到搖滾樂團GLAY成員TERU命名、沿途慢放嘅Teruhiko (坂井瑠星) 三四個馬位，見到Teruhiko騎落去仲有兩腳，都知大勢已去，末段都只係稍為追近少少，幫Tony等6人賺300分。M’s Begin今場表現應有進步空間，下場再出理應補中。

知舍POG古馬組有6駒報捷，精選賽事有2場，星期六京都3歲以上2勝1800米，少有越級挑戰成功嘅場合，「雍容白荷」半弟、金子真人名下Nebra Disk (岩田望來)，上半年跑足三場三冠預賽，最好一仗只係三級賽每日盃第3，出賽位又冇，收得賞金又冇，以1勝班身份 (400萬收得賞金) 重新開始，一嚟就挑戰2勝班，捧到1.9倍大熱，早段留守尾三位置，直路初段仲係重重圍困，岩田望來喺馬群入面搵到空位殺上去，順利反先一眾對手，下場可以繼續跑2勝班，仍然值得留意。