【兄弟制霸】Ho O Roulette捧走天狼錦標

競馬知舍
10月1日
讀畢需時 2 分鐘

睇完短途馬錦標，日本戰報先同大家睇古馬組賽事。

星期六阪神泥地2000米三級賽天狼錦標，睇吓4屆東京大賞典盟主Omega Perfume半弟Ho O Roulette (岩田康誠)，點樣喺泥地賽中近乎冇贏面、包尾嘅位置，一口氣反敗為勝，早段落後大約十個馬位左右，半程過後先跟得上主馬群，直路初段仲喺馬群入面重重圍困，最後200米左右搵到位望空，如入無人之境，將前面一輪惡鬥緊嘅June Aoniyoshi (西村淳也)、「世外仙都」(池添謙一) 以及「浮生」(川田將雅) 三駒，喺終點前一網打盡，兩兄弟事隔七年達成兄弟制霸。

精選賽事先睇星期六中山3歲以上3勝1600米，老將柴田善臣復出第4個星期，到今場交出今年首勝，睇吓上年菊花賞參戰馬、同樣係久休復出嘅「和平公爵」，有賽期早場2000米唔跑，走去跑一哩，排16檔起步，早段殺到入內欄放頭，轉入直路仲有兩腳，即使「初出即勝」(松岡正海) 喺末段步步進逼，仍能力拒來犯，爆出28倍冷門，升上公開班。

古馬組POG有4駒報捷，當中有2匹蘿蔔會一口馬都係莫雷拉寶藏，首先係星期六阪神3歲以上1勝2200米，睇佢點樣喺直路發揮Arrondi，走入內欄窄位推進，冇返少少膽量都做唔到 (至少日本本地騎師冇幾多個咁樣做)，反勝一眾對手，事後就算比小組「抽秤」罰款3萬日圓，都係好小事，正所謂「頭馬已袋，理 _ 得你」。

https://jra.webcdn.stream.ne.jp/web/jra/onetag2020/eqPcPlayer2.html?target=202504090807

星期日中山3歲以上1勝1600米，4月先喺同場同程打開勝門嘅Reverberate經過暑期成長之後，留到今仗復出，沿途坐住Boxseat位走得幾順，末段望空撲上去反應甚佳，三兩個箭步將Impact Sea (橫山武史) 追過，成功升班。

另外2駒都係喺2勝班建功，星期日阪神3歲以上2勝2400米兵庫特別，睇返早前喺比賽階段都有報導過嘅Danon Cima (西村淳也)，4月贏完以為進軍打吡，到頭來選擇喺條件賽再出發，6月升班出戰三田特別，不敵其後贏出日本海錦標嘅Goltzschtal；今仗早段居第3位，去到直路初段上前挑戰放頭嘅Circle of Joy (小澤大仁)，兩駒單打獨鬥，步步head住返嚟，末段仲按韁衝線，雖然只係贏後駒半個馬位，但贏來有餘未盡，睇吓幕後有冇興趣部署埋菊花賞，假若成行，亦值得留意。

同日稍後中山3歲以上2勝2000米茨城新聞盃，呢組就抄低一匹秋華賞潛在參戰馬，出自母系「湘南魔瓶」嘅良血馬女Shonan Someday (池添謙一)，似乎喺夏天上陣表現較好，2歲8月開齋之後，再跑4場，都係止於4-6名，到完咗POG比賽之後嘅7月先交出第2勝；嚟到升班之後第2仗，一路跟住大約第4位，直路一望空反應不俗，上完斜路奠定勝局，以1 1/4馬位取勝。