【六艇齊發】Grand Celeste擊沉大船Gran Maestro脫出未勝利

競馬知舍
11月6日
讀畢需時 2 分鐘

日本戰報第二節，轉同大家睇2歲戰線。

POG比賽組除咗Festival Hill之外，仲有6駒報捷，其中星期六有3駒喺未勝利場合得手，首先係東京泥地1600米組，「法老茶座」半弟、上線出自Into Mischief嘅Arcadia Cafe (連達文)，6月喺東京泥地千四初出搏失，今仗順利一放到底，以2 1/2馬位擊敗同場初出嘅Realize Tachyon (津村明秀)，幫Patrick賺560分，後者亦為Gordon賺220分。

跟住係東京2000米組，「迷人景致」後代出賽能力一般，又睇吓呢匹會唔會成為異數，講緊上線出自「氣自豪」、下線來自Social Club嘅Sunday會一口馬Solennellement (李慕華)，上次喺中山初出千八，追足一條直路，不敵Forte Angelo (翌日百日草特別亞軍)，連同場第三嘅Cozzolino再出都交出頭馬，今仗到佢增程二千，放足全程返嚟，幫美女敏賺560分。

最後到京都1800米組，睇吓Sunday會一口馬Fornax (杜滿樂)，早段跟住大約第4位，去到三四彎角，慢慢移出外疊，轉入直路一推落去，彈甩一眾對手，大勝3 1/2馬位而回，幫Dicky同Nathan賺560分。

轉到星期日三組東京賽事，先嚟未勝利1600米，上仗新潟初出大敗嘅「放聲歡呼」第一胎Gran Maestro (李慕華) 復出，全程擺到喺前面走，不過走住三疊，消耗唔少體力，末段力弱只得季軍，表現比上次有進步，相信稍後可以補中；再轉睇Grand Celeste，喺三浦皇成胯下成功一放到底，出道第四戰終於打開勝門，幫K3賺560分。

去到未勝利1800米組，上仗新潟初出不敵Garofano嘅絲綢會一口馬Tassel Knot (李慕華)，轉戰呢組成功補中，姿態有餘未盡，幫山大賺560分。

新馬2000米組方面，同大家睇吓絲綢會一口馬Arrow Metal (李慕華)，下線出過兩匹育馬者盃經典盟主，包括05年美國馬王「聖利駿馬」(Saint Liam) 以及17年冠軍「鋌而走險」，相當吸睛，母系本身都喺泥地一級賽上名，不過此子就部署草地初出，跑到蹄鐵都甩埋 (右前腳)，直路一度比Omega Dickon (戶崎圭太) 封位，但係比佢轉位望空，三兩個箭步上嚟，輕鬆反勝，幫達哥及Nok賺750分。