【POG六駒報捷】Smart Priere為原優介首勝重賞
- 競馬知舍
- 3月26日
- 讀畢需時 3 分鐘
嚟到日本戰報第二節，轉睇3歲組賽事。
星期六3場3歲大賽前哨戰，先睇中京1400米三級賽獵鷹錦標，朝日盃未來錦標 (一級賽) 亞軍Diamond Knot (川田將雅) 借今場復出，對住一班蝦兵蟹將，不費吹灰之力，順利拿下，幫Ivy仔賺4100分；幕後賽後講明放眼NHK一哩賽，望吓暫定陣容，未計兩場預賽六個出賽位，睇落得Realize Sirius能夠與之匹敵。
阪神就有2000米表列賽若葉錦標，一眾皐月賞收得線只有800萬嘅報名馬，例如6億馬王M’s Begin、「創世駒」大仔Bereshit，睇完今場應該鬆一口氣，皆因京成盃 (三級賽) 亞軍Matenro Gale (橫山和生) 落場，直路左穿右插殺上去，率先出線，即刻少一隻馬爭位；Lord Filer (坂井瑠星) 則在末段力拒Savoire Faire (松山弘平) 來犯，成功拎走第二席。
中山馬女限定1800米三級賽百花盃，連續兩期都有騎師首勝重賞，今次到原優介，接手秋華賞 (一級賽) 亞軍「醒目層次」之女Smart Priere，早段喺大約中間位置，直路一推落去，反應相當好，門前及時出頭，幫FT賺4100分；反觀「春秋分」全妹Exceed久休復出，李慕華發揮少少老襯，起步慢半拍，留到馬群後疊，直路拉出外父咁外追一段，追返個第3返嚟，一蚊本賞金都收唔到；要問下個月跑唔跑預賽爭出線，其實睇到佢健康問題都嚴重，唔係襟跑嗰隻，幕後會唔會部署三個月跑三場，都成疑問，分分鐘留返秋季跑條件賽，對佢進度仲好，而呢個第3亦為20人賺950分。
星期三大井上演泥地1700米京濱盃 (本地二級賽/藍冊表列賽)，4匹中央馬對3匹地方馬，某程度反映泥地三冠成立至今都幾失敗，中央強手呢個時間去晒中東，得返二線份子開上去大井，仲要得4個出賽位咁大把，本身爭出賽位都爭崩頭，地方馬連爭不論名次2個出線位都興趣欠奉，似乎NAR認真要諗吓計吸引地方馬參賽；上年一品紅錦標冠軍、蘿蔔會一口馬Rock Ptarmigan (西村淳也) 早前宣佈放棄阿聯酋打吡之後轉戰呢組，輕鬆擊退年頭藍鳥盃 (本地三級賽/藍冊表列賽) 盟主Finger (戶崎圭太)，當然雙雙出線羽田盃；地方今場2個出線位就由Zelos (笹川翼) 同Saikan Sanyu (安藤洋一) 拎走。
知舍POG今期仲有4駒報捷，首先係追加上星期三 (17/3) 園田賽事，兩戰全勝嘅Sky no Haru (廣瀨航) 升班再出，未受太大考驗下，成功連中三元，幫彭國年賺80分；園田大賽即將上演，特別係5月初嘅兵庫冠軍賽 (表列賽) 最重要，且看呢匹短途好手能否趕及出戰幫手爭分。
之後到三場中山未勝利賽，先係星期六草地2200米一組，社台一口馬Edel Seele (岩田望來) 選擇從內欄穿上，最後100米趕過頂頭大熱Red Regalia(李慕華)，跑到第三仗終於打開勝利之門，為Karl取得590分。這匹「鐵鳥翱天」子嗣想挑戰打吡的話仍有時間部署去青葉賞等預賽。
跟住到星期日泥地1800米一組，因傷所以2月份才出道的Sunday會一口馬Eagle Rock (石川裕紀人) 早段留守第7位左右，但有感步速太慢選擇中段變奏，對面直路尾已經搶佔先頭，最後頂住冷門馬Quad Forza (佐藤翔馬) 的追擊保住勝果，為Dicky賺得590分。
同日另一組跑草地2000米，蘿蔔會一口馬Sigiriya Rock (李慕華) 最後直路與中段變奏領先的Minazuki (石橋脩) 單打獨鬥，最終影相以鼻位險勝，幫社台包圍網贏得590分。有趣的是同日10分鐘前開跑的中京第6場頭馬Sarasvati (橫山武史) 正是此駒的半姊，甚至連馬主、檔位、人氣、完成時間都一樣，實在相當巧合。
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言