【冠軍賽馬日】三項一級賽完成排位

競馬知舍
4月23日
讀畢需時 1 分鐘

冠軍賽馬日今個星期日喺沙田馬場上演，三項一級賽主席短途獎、冠軍一哩賽及女皇盃都喺今早完成抽檔。

主席短途獎今年最終有八匹參戰馬，掛頭牌當然係現時19連勝嘅馬王「嘉應高昇」，排喺3檔嘅佢將會爭第20連勝。其餘7匹參戰馬將會喺後面爭Q，「里見夢境」（Satono Reve，8檔）、「驕陽明駒」（6檔）及「舉步生風」（2檔）邊匹機會高啲呢？

冠軍一哩賽方面，掛頭牌係日本一哩王「遠觀天象」（Jantar Mantar），佢將會排喺6檔起步。香港代表中最高分嘅「遨遊氣泡」就排喺12檔，上場喺1600米二級賽主席錦標贏馬嘅「金鑽貴人」就排喺4檔，兩駒分別由華將周俊樂同梁家俊策騎。主席錦標亞軍「祝願」就排喺10檔，兩匹四歲馬「白鷺金剛」及「小鳥天堂」就分別排喺5檔同2檔。衛冕冠軍「紅運帝王」就排8檔。

女皇盃方面，今屆只有八匹參戰馬。掛頭牌喺日本盃亞軍「蒙面舞會」（Masquerade Ball），呢匹李慕華策騎嘅賽駒將會喺6檔起步。今季四戰全勝嘅「浪漫勇士」就排喺5檔起步，將會肩負港隊保住此項錦標嘅重任。兩匹歐洲賽駒「御冠軍」（Royal Champion）及「同工之妙」（Sosie）就分別抽到1及2檔。