【北上縮程照贏】「拼勝堡」攻下堅蘭盃向金鷹錦標進發

競馬知舍
8月27日
讀畢需時 2 分鐘

已更新：8月28日

今期日本戰報一次同大家睇晒兩場重賞。

首先睇星期日嘅札幌1200米三級賽堅蘭盃，NHK一哩賽盟主「拼勝堡」(松山弘平) 北上復出，只為11月澳洲金鷹錦標試水溫，千二初出係有跑過，不過要對住去完杜拜復出嘅「紅瑪瑙」(三浦皇成)，以至走條件賽上位嘅Karpuz Pelus (橫山武史)、Namura Clara (濱中俊) 同齡之輩，既初跑西洋草，又要同年長馬負磅睇齊，兩大不利因素喺度，都能夠順利克服，末段交出強橫後勁，後上將前列對手一網打盡，松山弘平亦達成中央10場重賞完全制霸。「拼勝堡」今仗贏完，澳洲之旅成數相當高，但係去到當地，除咗對手，場地都會係一大變數，強如「百塔意城」唔適應淋地就慘敗收場，論佢正賽贏面，似乎難言樂觀。

另一場1600米三級賽新潟2歲錦標，6月喺東京初出大勝嘅Realize Sirius (津村明秀)，轉戰細場，亦未受考驗，以4個馬位再下一城；「博物街」半妹Festival Hill，今場搵石橋脩做替工，發揮不堪入目，早段略為搶口，直路兜入內欄衝一段，末段開個全場最快32.5秒，爭一步先追到Taisei Vogue (田口貫太)，收唔到本賞金，部署年尾場阪神馬女似乎唔穩陣。睇返POG戰況，Realize Sirius呢場頭馬幫慧敏賺3100分，未到9月已經手執八千幾分排榜首，Festival Hill亦幫Homan賺780分。

知舍POG除咗Realize Sirius之外仲有一駒交出頭馬，星期六札幌未勝利1800米，巴度雖然喺騎師賽無功而還，不過呢個星期都贏出2場頭馬，包括喺呢場賽事幫月初先出道、金子真人名下嘅馬女Strawberry Tree打開勝門，沿途無驚無險，一放到底，大勝3 1/2馬位，為Kami、P9及阿積帶來560分進帳。