【悲喜35天】日本退役馬膝部甩骹 手術成功卻無力回天
- 競馬知舍
- 7月3日
- 讀畢需時 4 分鐘
今年五月底，日本一匹已退役嘅地方賽駒，作為可供策騎馬匹（馬術俱樂部馬匹）時受傷，其右前腳膝部甩骹及骨折，唔少獸醫都建議安樂死。不過，馬主未有放棄並四出求助，最終有一所馬醫院肯接收該駒為其施行手術，開始呢個不可能任務。獸醫團隊之一嘅獸醫瀬瀬賢就喺自己嘅療養設施預留位置供其休養及於其社交媒體記錄整個過程。
5 月 9 號日本地方退役馬 Kutsushita Nugeta （クツシタヌゲタ）受傷，並聯絡瀬瀬賢以尋求安樂死以外嘅方法，最後經過討論後，瀬瀬賢為其安排願意為該駒施行手術嘅醫院，最後成功搵到並透過長距離運送下抵達醫院。過程中，Kutsushita Nugeta 情緒穩定，未有令傷勢惡化。
主診獸醫喺 5 月 14 號為 Kutsushita Nugeta 施行手術，對嚴重錯位嘅橈骨及膝頭骨復位，過程中鑲左兩塊鋼板及 25 粒螺絲喺患處，以固定復位後位置。整個手術以全身麻醉進行，歷時七小時。 Kutsushita Nugeta 於麻醉藥可以喺吊起帶協助下站立，且食欲正常。獸醫團隊於術後未有掉以輕心，一直觀察手術位置有否出現感染、鋼板能否固定患處及未有受傷嘅腳會否因負擔過重而引起蹄葉炎。
手術後兩日（5 月 16 號），Kutsushita Nugeta 右前腳患處並無大礙，但左前腳似乎因為體重轉移到該腳而發熱，有蹄炎葉嘅風險。團隊亦無怠慢，繼續以吊帶協助減輕負擔。手術後五日後（5 月 19 號），左前腳嘅熱感有所消除，Kutsushita Nugeta 亦都願意自行喺馬房內輕微走動，一切似乎都向好發展。
不過，去到術後第七日（5 月 21 號），情況一夜間轉壞，患處以外三隻腳都有發熱嘅情況。獸醫團隊決定以止痛藥同消炎藥改善情況。不過其後七日三隻腳依然持續發熱及趾動脈有充血，情況未有太大改善。另外，Kutsushita Nugeta 可能因為疼痛而減少喺馬房內走動。不過，唯一無變嘅係 Kutsushita Nugeta 食欲依然旺盛。
手術後兩星期（5 月 29 號），獸醫團隊為 Kutsushita Nugeta 手術位置更換石膏並檢查康復進度。傷口因與石膏摩擦，以致部分傷口未能完全癒合。但因關節受感染範圍受控，所以佢地決定如期為 Kutsushita Nugeta 拆線。 X 光顯示膝關節固定良好，鋼板亦無移位。蹄部亦無出現蹄葉炎引致嘅蹄骨異樣。不過，發熱情況持續。
5 月 31 號，檢查一對後腳發現蹄冠有凹陷， Kutsushita Nugeta 站姿亦改為保護後蹄嘅站立姿勢，呢啲都係蹄葉炎嘅徵兆，情況令人擔憂。但同時，右前腳傷勢卻逐步轉好，感覺就好似同時間競賽。其後右前腳一度因為唔習慣新石膏而未能伸直，直至數日後先可以伸直。同時四肢嘅趾動脈依然充血，後腳蹄冠依然凹陷，蹄葉炎症狀持續未有消退。整個過程中，一直正面嘅係 Kutsushita Nugeta 嘅食欲從未間斷。
去到 6 月 8 號，團隊再次為 Kutsushita Nugeta 換石膏同時檢查患處康復情況，其鋼板未有受損，固定狀況依然良好，傷口只有小部份未癒合，感染持續受控。不過，蹄葉炎情況嚴重，特別一對後腳， X 其光顯示蹄璧與蹄底出現分離。為左確保蹄底有足夠支撐，團隊為其安排軟底護蹄鞋。
之後 Kutsushita Nugeta 蹄葉炎狀況時好時壞，而右前腳則慢慢好轉。瀬瀬賢亦喺 6 月 11 號公布該駒名字。其後蹄葉炎一直影響 Kutsushita Nugeta 精神及食欲，去到 6 月 17 號左前腳蹄葉炎已令佢無法伸直左腳，檢查發現左前腳蹄葉已分離，蹄骨扭轉，為 Kutsushita Nugeta 帶來極大痛苦。最後獸醫團隊與馬主商議後決定該駒於 6 月 18 日安樂死，於手術成功 35 日後離世。
瀬瀬賢於最後一則關於 Kutsushita Nugeta 表示膝關節固定手術本身喺全球而言成功案例極少，日本國內更無成功個案。但佢地依然為拯救生命而挑戰，雖然最後都未能成功。呢場被認為「沒有活下去意義」嘅挑戰，單從結果而言，團隊確實未能救番佢。但佢相信今次挑戰並非毫無意義，並相信呢段經歷可促進獸醫醫療發展，為日後拯救其他賽駒踏出第一步。佢最後感謝參與醫治嘅獸醫團隊，選擇手術而付出巨額費用嘅馬主及於社交平台支持佢嘅每一位。
對於自己未能救返 Kutsushita Nugeta ，佢感到相當抱歉。
呢個故事並非一個美好結局，同時反映要救回一匹斷腳賽駒並不容易。即使手術成功，但面對各項併發症卻難跨越。隨著科技發達，或許今日瀬瀬賢團隊所做嘅一切，埋下日後成功治療嘅種子。佢地能夠踏出第一步，已經相當唔容易。
Source: @masarusese
Photo: @masarusese
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言