【換衫新開始】「聽講」捧走新潟紀念

競馬知舍
9月3日
讀畢需時 2 分鐘

嚟到日本戰報夏季完結篇，上半場先睇古馬組戰況。

星期日新潟上演2000米三級賽新潟紀念，雖然「皇后徑」(川田將雅) 賽前走甩退出，不過今年轉跑平磅罰則後仲有「寬道路」(津村明秀)、「野田猛鯨」(佐佐木大輔) 呢類喺一級賽上名份子落場，比以前讓磅年代好睇得多；維多利亞一哩賽季軍「聽講」(坂井瑠星) 有傳原馬主財困，事隔一個暑假轉手至「GT系」馬主田畑利彥名下復出，喺直路上交出強橫後勁，末段一網打盡，成功奪魁；青葉賞盟主Energico (李慕華) 初對年長馬，跑入亞軍亦算不俗，反而 2025年仲見到「大怪奇」(菅原明良) 上名，有少少意外；至於今年嘅夏季2000米系列總冠軍，就落喺今場跑第5嘅Veloce Era (丸山元氣) 身上。

星期二盛岡就有 3歲限定泥地2000米不來方賞 (藍冊未評級)，5匹中央馬d-r-m-f-s返嚟，高多芬名下馬Narukami (戶崎圭太) 上年初出大勝12個馬位，唔少人睇好佢會係泥地三冠爭標份子，點知年初轉歲復出即遭遇大敗，幕後快手將佢由坂口智康手上拉倉，過檔去田中博康麾下，索性放棄頭兩關，喺條件賽重新開始，隨即連贏兩場，今仗轉戰盛岡爭泥地經典賽入場劵，沿途順放，末段仲有兩腳拋離對手，一放到底返嚟，順利出線，下個月開入大井面對Natural Rise同「喜飆速」，應有一番龍爭虎鬥。

精選賽事就睇星期六新潟3歲以上3勝2200米日本海錦標，近兩年以3歲馬身份贏出呢場嘅「堅韌力」同「拯救者」其後扶搖直上，前駒攻下菊花賞，後駒先在菊花賞跑入亞軍，再贏出今年春季天皇賞，嚟到今年就有青葉賞季軍Goltzschtal (坂井瑠星) 接力，6月喺阪神跑2勝班得手，今次升班再進一步，同「神通大勝」(荻野極) 鬥足後半程，末段力拒來犯取勝，幕後隨即放眼菊花賞，相信屆時係爭勝要角。