【日本盃】「蒙面舞會」續配李慕華戰日本盃

日本盃將會於11月30號上演，除左有幾匹海外賽駒落實出戰外，三歲新銳亦都準備就緒。

當中包括剛戰喺秋季天皇賞對陣年長馬獲勝嘅「蒙面舞會」（Masquerade Ball，マスカレードボール）。呢匹「大鳴大放」（Duramente，ドゥラメンテ）子嗣今個月初喺李慕華胯下攻下服役首項一級賽勝仗。

小休過後，幕後決定安排呢匹三歲馬轉戰日本盃。對上兩匹三歲秋季天皇賞得主「春秋分」（Equinox，イクイノックス）及「樂透心」（Efforia，エフフォーリア）都未有於同年出戰日本盃。無獨有偶地，兩駒其後出戰有馬紀念賽都能奪冠。

對上一匹三歲賽駒出戰日本盃嘅秋季天皇賞得主係2002年嘅「吉兆」（Symboli Kris S，シンボリクリスエス），當時該駒敗於「飛霸」（Falbrav）蹄下得季軍，而1996年秋季天皇賞冠軍「吹波糖」（Bubble Gum Fellow，バブルガムフェロー）轉戰日本盃更大敗而回。

「蒙面舞會」要克服此魔咒並唔容易，加上今年對手唔弱，相信要靠一靠近期狀態非常好嘅李慕華幫幫手。李慕華接受法國傳媒訪問時表示自己將會策該駒出戰日本盃，希望可以為該駒帶來第二項一級賽冠軍。

Source: Paris Turf

Photo: 賽事截圖

==============================

最新文章