【直路單打獨鬥】Admire Quads每日盃2歲錦標險勝而回

競馬知舍
11月20日
讀畢需時 2 分鐘

日本戰報第二節，轉睇2歲賽戰況。

先睇星期六京都1600米二級賽每日盃2歲錦標，又係友道康夫訓練、近藤旬子名下馬，睇吓嚟緊呢匹馬有冇「頌讚火星」咁勁，講緊就係Admire Quads (坂井瑠星)，今仗同絲綢會名下Cavallerizzo (杜滿樂) 鬥足一條直路，去到終點前先出頭，險勝一個頭位，更以1:33.1打破2歲同程紀錄；同場唯一重賞頭馬Candide (北村友一) 直路推極都冇反應，包尾而回，賽後驗到爆缸，起碼要抖一排。

知舍POG今期有3駒報捷，首先係星期六東京未勝利2000米，睇吓24年北海道Selection Sale週歲價1億生Olufsen，特別要留意馬昆喺直路發揮，值得日本騎師學嘢，喺馬群入面左穿右插，去到最後200米先有位望空，一推落去，三兩個箭步就掃晒，幫P9賺560分。

星期日東京未勝利1800米，木村哲也今期2W賀壽，除咗「蕾麗宮」之外，仲有同屬Sunday會名下嘅Lansdowne Road (貝知仁)，直路一望空率先突圍，雖然一轉右腳就內閃，後面亦有Big Hero (團野大成)、Rey Historico (馬昆) 一對追擊，不過都叫保住勝局，幫RedBlue、Lag及FT賺560分。

同日稍後京都新馬2000米，轉播賽日頭場，下河邊牧場出品、由「神業」馬主私下購入嘅「進路」(Access，北村友一)，雖然出閘稍慢，但半程過後一踩油，已經追返唔少，直路上再推一段，奠定勝局，以3個馬位大勝，幫雷狼柴賺750分；同場第4嘅「深蒼勁」(松山弘平) 直播都有講到，早段嚴重脫節，去到接近直路，飛出去七疊入彎，鞍上人連鞭都抽唔到出嚟，都仲有一席第4，交出呢種表現，相當吸引，再出想唔熱都難。