【知舍POG古馬組開紅盤】Buena Onda京都金盃先拔頭籌

競馬知舍
1月7日
讀畢需時 1 分鐘

踏入2026年，日本戰報繼續同大家見面，今次同大家睇3場年長馬賽事。

每年日本馬都係以兩場金盃打頭陣，先睇京都金盃，跑1600米，ChatGPT繼「蕾麗宮」後又多一匹重賞頭馬，Buena Onda (川田將雅) 升班之後出戰兩場公開班都上名，今次上試三級賽更進一步，門前一輪混戰之下，啱啱好將Fervent (松山弘平) 擒下，連埋大冷門Shonan Addeybb (池添謙一)，一開年就開條100萬三重彩出嚟；大熱「撥亂飛槍」(吉村誠之助) 直路應該睇到大家吐血，幾乎走足400米死位，去到終點前望空一下，跟住就停晒，當粉筆字抹咗佢好過！

跟住轉睇中山金盃，跑2000米，一對Sunday一口馬包Q，津村明秀跑親三級賽認真醒神，睇吓呢匹「歡快舞步」，沿途守住好位，直路一早出頭，一路block實Angola Black (戶崎圭太)，後者去到最後100米先望空，如狼似虎撲上去，最後一步以為過咗頭，不過去到影相，都係「歡快舞步」保得住勝局。