【破18年前紀錄】「撼動你心」札幌紀念橫掃全場
返嚟日本戰報，今期同大家睇5場賽事。
睇中央賽事之前，先睇星期四門別3歲限定1200米表列賽北海道短途盃，「最佳綠色」(落合玄太) 去完沙特返嚟第一場對住年長馬炒成條街返嚟，去到埼玉盃唔夠「湧泉王」、「盈寶威神」爭就話級數有別，對返同齡對手唔係擺下擂台係乜？就算「夢成真」(阿部龍) 喺前面一度放離四五個馬位，一樣未驚過，末段等佢放到七七八八，睇住嚟食，稍後部署6化郎交流重賞，絕對有力一爭；「東海寶愛」(石川倭) 起步慢閘等同送頭馬出去比人，追返個第3返嚟可以話憑質素搭夠。
星期日兩場重賞，中京1600米三級賽中京紀念，新勝嘅「金之礦」(西塚洸二) 直路早段一度係威係勢，被「艷紫芳馨」(岩田望來)、「越洋競渡」(松山弘平) 左右夾擊，「艷紫芳馨」反應較佳，戰至末段透出，以1:31.1打破場地紀錄；久休復出嘅「里見照耀」(高力德) 直路都交出一段追勢，一席季軍都算不俗，只係對住路有專長嘅「艷紫芳馨」，喺一度埋到身嘅情況下比人拋離，一哩就肯定嫌短，熱完身跑返千八二千仲好。
札幌上演2000米二級賽札幌紀念，友道康夫出一對成為大次熱門，結果雙雙成為笑話，「地球頌」去凱旋門大賽之前北上熱身，不過鞍上人坂井瑠星發揮認真不敢恭維，明明友「好脆」(岩田康誠) 主宰步速都唔慌慢得去邊，去到對面直路頭突然踩油，想用氣量收死對手，大家唔好唔記得佢係均速馬，冇乜加速力，未入直路已經企咗喺度，幕後就話按原定計劃出發去法國，Tony情願佢跑嘉登大賽，機會起碼大啲；至於自己友「投擊俱佳」(川田將雅)，跟足大半程，最後200米都要企埋一份，賽後幕後話二千嫌長，4歲先過一半咁快轉性能？應付唔到快步速先係問題所在；反觀另一熱門「撼動你心」，可以話係古川吉洋近年代表作，直路沿外檔長驅直進，輕取2 1/2馬位，更以1:58.2破場地紀錄！古川今期可謂雙喜臨門，今月初剛為人父，再憑「撼動你心」捧走夏季唯一二級賽，值得恭喜，幕後話明以秋季天皇賞目標，不過先前未跑過東京兼遇上強手，相信係一大考驗。
精選賽事就睇「夏日雙阿」，每年都有兩場以「阿」字開頭跑長途嘅2勝特別賽，對於有意出戰菊花賞嘅3歲馬嚟講相當重要，今年同樣由3歲馬勝出，星期六新潟2200米阿賀野川特別，一對3歲馬成為熱門，青葉賞季軍Black Olympia (川田將雅) 被捧為1.5倍大熱，若葉錦標亞軍「紡紗王」(戶崎圭太) 為3倍次熱，跑到最後直路兩駒單打獨鬥，但Black Olympia一條直路未能越雷池半步，甚至最後有拋離之勢，「紡紗王」由頭帶到尾，以2:09.3打破場地紀錄。「紡紗王」在皐月賞大敗後稍作休整，先輕取7月尾中京的一勝賽，再攻下今仗，連勝兩場條件賽幾可穩奪菊花賞出賽資格，長遠專精2000米左右賽事會有一番作為；至於前POG大船Black Olympia，今場其實無跑錯，想爭入場券但剩下的賽事選擇已經不多，Tony就一早講隻馬相當均速，2400米以上先係最佳，當初去北海道一轉贏面可能更大。
星期日札幌2600米阿寒湖特別，上個月喺函館狂數14個馬位嘅Danon History換上佐佐木大輔，照樣捧成1.2倍頂頭大熱，結果不費吹灰之力，大勝8個馬位而回！Danon History連續兩場2600米條件賽大勝去到菊花賞肯定會成為焦點，觀乎潛在參戰馬，甚至有機會成為次熱門，Hawaii就問會唔會係「洛夫琴山」最大對手？Tony就唔係睇得咁簡單，賽後即刻講，喪鐘已經為「洛夫琴山」而敲！(Tony按：今期知舍POG古馬組除Danon History外另有一駒報捷，比賽組五駒全軍覆沒。)
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言