【衰家食尾糊】「賢德之君」阪神盃險勝

競馬知舍
2025年12月31日
讀畢需時 2 分鐘

已更新：1月7日

嚟到今年最後一期日本戰報，同大家睇2場賽事。

先睇星期六阪神二級賽1400米阪神盃，年尾呢啲平磅賽見到一班老朋友，不論種種原因，選擇留喺日本，唔嚟香港打爆「嘉應高昇」，What a waste! 「賢德之君」(鮫島克駿) 本身係有值得來港試多一次，奈何幕後決定放棄，寧願留喺本土「也文也武」，嚟到平磅場合終於贏返一次，仲要係破場地紀錄 (1:19.0)，只係過程相當驚險，直路初段一早出頭之下，幾乎比「奈村佳盈」(李慕華) 從後得手；後駒就一貫阪神短直路通病：留得太後，直路早段走得唔係好順，去到最後200米先有位殺上去，埋門一步先影輸，可以話欲哭無淚，出年高松宮紀念應該係佢最後一戰，但係以佢近幾場都追唔切嘅表現計，想贏返場退役相信難言樂觀。

知舍POG方面，希望錦標只有Badrinath (坂井瑠星) 跑入第5名，幫MKC同Ozil賺700分；其餘參賽場合入面，只得1駒勝出，就係星期日中山轉播場合新馬2000米，睇吓絲綢會一口馬「塔狀高雲」(Congestus，杜滿樂)，此駒Tony不諱言係今年POG比賽考慮馬之一，上線來自「鐵鳥翱天」再加維省橡樹盟主「紀華莫沙」配合，血統看似有長力幾吸引，奈何年初發現蹄叉腐爛，唯有放棄；今期借道中山初出，全程守住大約第4位左右，去到三四彎角一踩油，反應不俗，好過馬昆鞍上嗰隻「里見古典」，彎都未識轉，蝕咗唔知幾多個馬位；直路再推一段，輕鬆控制大局，以1個馬位取勝，幫Ivy仔賺750分。

12月所有比賽結束，睇吓知舍POG成績，Nok暫時領先，慧敏同FT緊隨其後。