top of page
搜尋

【近六場贏五場】Flicker Jab首勝重賞 為短途馬錦標鋪路

  • 作家相片: 競馬知舍
    競馬知舍
  • 6天前
  • 讀畢需時 2 分鐘

返嚟日本戰報第一節，先睇三場年長馬賽事。


今個星期得一場重賞，星期日小倉三級賽1200米北九州紀念，早前戰報已經提過、5月喺京都以破場地紀錄時間贏馬嘅Flicker Jab (松山弘平)，回師先前兩戰全勝嘅小倉，未受太大考驗，早段跟實放頭馬，半程過後帶出，末段力壓越級挑戰嘅Jennifer (田山旺佑) 取勝，距離短途馬錦標呢個目標又近一步。近期短途戰線七國咁亂，連最有機會贏到「嘉應高昇」嘅「孫子」都匆匆退役，要再搵一匹潛力股確實唔易，呢匹Flicker Jab相信係近期日本呢邊不二之選，連埋啱啱喺香港初出大勝兼破處嘅「實力股」，且看嚟緊半年進度如何，年尾香港短途錦標，應有一番龍爭虎鬥。

 

知舍POG古馬組有5駒報捷，同大家睇其中兩場，首先係星期六函館3歲以上1勝2600米，講之前先回顧上年安田紀念賽日東京新馬千八，11匹馬排位，亞軍「膽大」、季軍「清潔能源」、退出嘅「大都市區」都贏出級際賽，另有5駒稍後再出都有頭馬落袋，唯獨頭馬Danon History表現失色，再出一場東京體育盃大敗而回，去到年初連續報名四場，因為狀態問題未有上場，錯過春季經典戰線，延至今場先復出，叫到濱中俊幫手，不費吹灰之力，狂數14個馬位而回，場地紀錄亦幾乎打破 (只慢3線)！幕後揀得今場復出，都係意在菊花賞，留喺北海道再跑多場二千六——阿寒湖特別——用呢條王道路線殺上去，阻止「洛夫琴山」達成三冠，指日可待。

 

同日小倉3歲以上3勝1800米博多錦標，POG叫夠四飛，留意早前贏出兩場2勝班、「雍容白荷」半弟Nebra Disk (川田將雅)，沿途跑來幾乎一步不蝕，入直路沿住內欄條私家路殺上去，輕鬆拋離對手3個馬位，成功升班；大熱「激動美韻」(團野大成) 跑完皐月賞之後小休一輪，幕後放棄上星期日經電台賞，留返今期初對年長馬，不過細場唔係好啱發揮，轉直路彎飛出六疊，蝕咗唔少腳程，去到門前幾經辛苦先追過冷門「萩野金牛」(望月洵輝)，保得住條大熱Q，稍後返去阪神、京都呢類大場再出，理應補中。

 

Photo: 賽事截圖


==============================

Telegram公海：https://t.me/GoldRacing

 
 
 

留言

bottom of page