【近年維省最嚴重山火】維省靈犀牧場受山火波及 希斯感歎馬匹求生能力
- 競馬知舍
- 1月12日
- 讀畢需時 2 分鐘
維省Longwood地區發生嚴重山火接近一星期，區內多處受山火波及，超過300幢建築物遭焚毀。位於當地嘅靈犀牧場亦受波及，練馬師大衛希斯一度回澳洲協助家人及牧場，惜仍有七匹馬離世。
練馬師大衛希斯喺琴日趕及回港出席賽馬日，並以「中國心」取得頭馬。賽後佢接受訪問表示自己啱啱從山火現場回到香港，並已經兩日半未有訓過覺，一直對抗山火同時照顧馬匹。直至靈犀牧場所處地區山火受控後，佢先決定喺搭飛機回港。
佢今日接受澳洲媒體SEN Track表示靈犀牧場嘅灌溉系統設於主馬房及牧場大樓周圍，形成一道水屏障，為山火時安全區。雖然牧場內九成土地被焚毀，包括比安希斯屋企及部分馬房，但佢地能夠將大部分馬匹及時帶到安全區，令佢地倖免於難。不過大火仍帶走五匹賽駒及兩匹退役馬，共七匹馬性命，靈犀牧場亦已通知有關馬主。
希斯表示合共有320匹賽駒暫時處於安全區域。談及帶走咁多馬匹嘅經歷時，希斯就話感歎馬匹嘅求生能力比佢地想像中頑強。當佢地牽引一匹馬再給予指路燈時，其他馬匹就會跟隨前行，最後佢地都能夠抵達安全區並成功脫險。希斯表示未曾見過馬匹會咁樣做。
上周五靈犀牧場附近處於最大火時間，希斯一度擔心整個投資龐大嘅靈犀牧場會被完全焚毀。雖然安全區內未有失守，但佢地喺周圍都見到火頭，並需於風速達每小時90公里及45度高溫下防止火勢蔓延至安全區，這令佢地一家超過兩天未有睡過一覺。雖然最佳做法應該係疏散所有馬匹到其他地方，但大火期間所有道路都封閉，令佢地被逼孤立於原地。
除靈犀牧場，區內另一個訓練牧場Leneva Park亦受波及，場內馬匹早前已轉移到維省其他牧場暫避。現時當地山火仍然持續，但靈犀牧場所處地區火勢暫時緩和。
Source: Racenet, SCMP
Photo: State Control Centre Victoria
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言