【遠征日本】「舉步生風」報爭兩項日本短途賽

練馬師葉楚航喺主席短途獎後表示會安排旗下賽駒「舉步生風」遠征日本。今日馬會公布「舉步生風」報爭當地兩項9月嘅短途級際賽。

「舉步生風」現時喺阪神競馬場上演嘅1200米二級賽人馬錦標（9月6號）及中山競馬場上演嘅1200米一級賽短途馬錦標（9月27號）報名。兩項級際賽頭馬獎金分別係5900萬日圓（約288萬港元）及1億7000萬日圓（約830萬港元）。

香港代表出戰短途馬錦標並不罕見，近兩年香港都有代表遠征呢項一級賽。而二級賽人馬錦標方面，以往共有三匹遠征過呢項二級賽嘅香港代表，分別係2010年嘅「綠色駿威」（亞軍）及2011年嘅「天久」（亞軍）及「綠色駿威」（第14名）。

早前日本報導，國際評分未達120分之賽駒，有機會不獲資助旅費。現時國際評分於120分樓下嘅「舉步生風」，相信幕後自費機會大。或許因為咁，幕後決定喺當地出戰前哨戰熱身之餘，仲可以搵番啲旅費，畢竟咁樣嘅話只需要比一次來回「舉步生風」機票錢。

當然9月初跑關西，9月底跑關東，意味著「舉步生風」需要作一次長距離輸送，呢個都係成行嘅話，團隊需要面對嘅難題之一，且看最後是否成行。

Source: HKJC

Photo: HKJC

==============================

最新文章