【7歲初勝重賞】京都大賞典高唱天生魅力「大怪奇」

競馬知舍
10月8日
讀畢需時 1 分鐘

今期日本戰報同大家一次過睇兩場重賞。

星期日兩場秋季天皇賞前哨，賽果尚算正路，先講早少少開跑、2400米二級賽京都大賞典，如果話近年重賞層面，有邊啲馬去到老將階段，仲能夠跑入三甲，以至贏馬，而全世界一片慘叫聲，澳洲代表有「樂觀派」，日本代表應該數到今期主角「大怪奇」(濱中俊)，上年仍有能力喺重賞上名，今年更連仗入圍，上場新潟紀念追回一席接近嘅第3，嚟到今仗再進一步，直路沿內檔衝一段，將沿途領放嘅「旭日全球」(池添謙一) 擒下，首勝重賞；上仗贏出目黑紀念嘅「地球頌」搵川田將雅做替工，撞正最啱發揮嘅軟地，全面機會之下，居然三甲不入，略嫌失望。

另一組東京1800米二級賽每日王冠，武豊最後揀騎全場唯一3歲馬「里見照耀」，論馬實力唔差，不過沿途人馬角力，最後關頭對住一齊放足大半程嘅「好脆」(岩田康誠)，都過唔到頭，「生活格調」(津村明秀) 表現復蘇，直路中段上前挑戰「好脆」，稍作推騎，即輕鬆反先，鞍上人首勝二級賽，時間1:44.0只係比紀錄慢一線，姿態有餘未盡；反而「雪嶺熱點」(戶崎圭太) 臨場行圈唔靚都知凶多吉少，果然落到場冇段好睇。

今期POG比賽組冇馬贏，古馬組除咗「生活格調」之外另有3駒喺東京報捷。