【POG大船再出發】「喜笑法力」新潟紀念稱雄
繼續日本戰報，一次過睇8場賽事。
星期日中京上演2歲1400米三級賽中京2歲錦標，「金衣公子」呢個父系今年2歲呢一水子嗣表現出眾，同「樂透心」不相上下，喺呢組出一對，結果一Q返嚟，6月喺福島一出即勝嘅G T Maika (松山弘平) 直路自動波追一段，行過一眾對手，輕取而回，前川恭子亦成為首位贏出重賞嘅JRA女練馬師，時間1:19.7只係慢場地紀錄3線。G T Maika稍後會以阪神2歲雌馬大賽為目標，以今場開個快時間、贏馬姿態輕鬆計，值得憧憬，最大對手相信係社台系一堆「親生女」。Siskin Bloom (團野大成) 幾乎一步不蝕，奈何G T Maika實在太強，一席亞軍已盡所能；Biscuit Sand (北村友一) 塞足一條直路，臨尾要跟Siskin Bloom條私家路先追近，幕後相信條氣唔順，稍後再出仍可留意；Sant'Angelo (西村淳也) 就好遲先撻著，千四似乎嫌短，稍後增程更好。喺知舍POG方面，Sant'Angelo幫Patrick、卓爾達、慧敏同Edward賺340分，兩隻都有揀嘅K3就執1190分。
星期日新潟三級賽2000米新潟紀念，自舊年轉為平磅罰則賽之後吸引唔少大賽份子借呢場熱身，今年11匹馬入面更有5匹一級賽盟主上陣，不過全部都敵不過如月賞冠軍「喜笑法力」，此子早前流鼻血緣盡打吡，如今取道今組復出，賽前遇上大雨如有神助，岩田望來發揮一絕，直路抄內檔殺上去，越騎越有，末段力拒NHK一哩賽盟主「名店滿街」(李慕華) 取勝；「喜笑法力」稍後都應該以秋季天皇賞為目標，不過對住「北十字星」好難佔到甜頭，除非撞正落雨場合否則免問；「名店滿街」初跑二千有驚喜，如果唔係直路塞足一輪，最後二百先望空，相信頭馬早已到手，原本諗住返到東京場地許可有力反先，星期三就收到消息話右前腳繫韌帶發炎，似乎秋季賽事都可以提早講拜拜；大熱門Danon Cima (川田將雅) 直路初段以為大把喺手，到頭來門前幾步反應麻麻，跑返哩半應該先最啱佢。
知舍POG古馬組除咗「喜笑法力」之外仲有3駒報捷，不過跟進賽事就唔係睇佢哋，而係睇經典戰線。星期日新潟三勝班草地2200米的日本海錦標，往年是一場菊花賞指標賽事，今年只有「北十字星」全弟Charing Cross (戶崎圭太) 一匹3歲馬列陣，但賽前因為晨操時間一般，再加上賽日體重比上仗增加了18公斤，結果這些疑慮成真，拉出大外檔衝刺但反應遲緩，只以第7名完成，而今場賽事由4歲雌馬Shadow Meteor勝出，五戰三勝班終於突破上公開級，10月同場同程的新潟雌馬錦標應是下仗目標所在。至於Charing Cross先把狀態調整好再論菊花賞的機會。
轉去泥地組，繼早前提及大阪盃賽日1勝1800米水準甚高，5月京都1800米表列賽鳳雛錦標亦都值得留意，頭二馬同一星期先後建功。先睇星期日中京3勝泥地1900米白川鄉錦標，「情濃依偎」(坂井瑠星) 早前喺大阪盃賽日1400米公開賽不敵「夢成真」，其後逐步增程，越長越妙，先贏東京1勝1600米，再到鳳雛錦標跑入亞軍後，落返班際行列，8月初喺中京2勝1800米先贏同班指標「騷靈爵曲」，原先部署不來方賞，點知要做後備，結果提早出擊，後上撃退另一匹3歲馬Dantsu Shitan (太宰啟介)，相信目標都係泥地經典賽 (表列賽)，只係中央7個出賽位，2個預賽頭馬加5個獎金位，初步又係做後備，出唔出到都要睇啱啱去完美國嘅二冠馬Finger臉色。
至於星期二盛岡2000米表列賽不來方賞，Livedoor創辦人堀江貴文近年以SNS Group名義重投馬主行列，名下呢匹Itterasshai (戶崎圭太) 年初目標遠大，打算出國遠征，奈何中東戰火，被迫放棄阿聯酋打吡，轉去伏龍錦標 (公開賽) 爭肯塔基打吡資格，又衰喺Danon Borbon手上，要到鳳雛錦標先食糊，今次面對春季三冠組上位嘅Rock Ptarmigan (西村淳也) 同Realize Glint (坂井瑠星)，一樣視之如無物，一放到底，大勝6個馬位，造出2:00.9只比「小林歷奇」紀錄慢一線；歷來喺日本做到2000米跑到2分00秒嘅馬只有4匹，「小林歷奇」、「醒目飛鷹」同Furioso三駒都晉身一級賽盟主行列，呢匹Itterasshai今後值得期待，至少去到泥地經典賽都有能力做到第三勢力。早一輪轉播賽亮相嘅「名將佳麗」(太宰啟介) 賽日體重肥咗21kg都心知不妙，一落場表現走樣，對大局全無威脅；地方馬就以主場練馬師菅原勳出一對表現最好，名次計就以東北優駿冠軍Legend Barows (山本聰哉) 較佳，頭段跟到Itterasshai步速，直路完全腳軟都仲頂到一席第5，贏出鑽石盃嘅Fours Men (吉原寬人) 末段收復唔少失地，先過「名將佳麗」返嚟，嚟緊岩手本地賽事應該係呢對孖寶天下。
知舍POG比賽組就有2駒報捷，星期日中京未勝利草地1400米賽事，Viverone (松山弘平) 捧為1.5倍大熱，入彎早早走外疊，直路打兩鞭輕易趕過其他馬以兩個半馬位勝出，為Homan及Ozil賺得590分。Viverone於6月份出道，當時敗給Top Checker，Top Checker其後在新潟2歲錦標跑獲季軍，以今仗贏馬表現Viverone在雌馬戰線應有力一戰。
轉到新潟草地1800米新馬賽，有橡樹冠軍「雪嶺熱點」半弟Cestino (李慕華) 登場，成為1.7倍大熱，早早跟住三四位，直路拉出跑道中央衝刺，雖一度受到次熱門Pentozalis (岩田康誠) 的挑戰，但仍然以一個馬位勝出，為AllenW、KK、牙笙、Davi及Alan五位玩家增加780分。Cestino父系「樂透心」今年第一批產駒已經取得第10場頭馬，再加上同系馬出名早熟，2歲戰線及經典戰線應會頗受注目。至於亞軍的Pentozalis也有一定質素，突破未勝利指日可待。
最後一場北上札幌睇草地1800米新馬賽，一匹下線源自「奧斯卡夢」、2025年Select Sale週歲價1億3000萬生Van Cry (武豊)，一匹Sunday會一口馬、NHK一哩賽盟主「太空隕石」第3胎Ilulissat (橫山武史)，由賽前飛數去到落場，都係由頭鬥到落尾，全程走三疊嘅Van Cry彎位開始踩油率先突圍，Ilulissat由內檔慢慢移出咬實唔放，單打獨鬥之下，都係Van Cry更勝一籌，姿態有餘未盡，武豊下年經典戰線會唔會靠佢？「太空隕石」頭2胎能力平平，都係以未勝利身份退役，呢匹Ilulissat就相對唔同，毛色係跟下線灰毛，多少令人期待，今場睇到質素應該唔差，稍後再出可望補中，喺知舍POG入面就幫Homan、Patrick、大鴻、Edward同P9賺310分。
睇吓知舍POG跑完8月所有賽事之後嘅成績，Edward月尾一輪搶分之後，以160分之差反先南總，慧敏、Nathan同K3三位都超過4000分。
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言