【兜兜轉轉都係跑返草地先贏到】A T Makfi捧走京阪盃

競馬知舍
3天前
讀畢需時 1 分鐘

嚟到日本戰報第一節，先睇兩場喺京都舉行嘅重賞。

星期六先上演2歲三級賽2000米京都2歲錦標，三木正浩今年2歲組都有唔少好馬，其中夏季一出即勝、即將復出嘅Justin Chicago同早前喺泥地打開勝門嘅Justin Le Mans都係POG比賽有人揀嘅，不過今次要講嘅就係一匹暗牌馬，呢匹24年北海道Selection Sale週歲價5200萬生Justin Vista (北村友一)，10月喺京都初出贏千八，今仗上試雙彎二千，沿途居馬群中間位置，去到直路一度比對手撞出更外疊，但係北村一擺正堂軚嘅時候，一彈右腳出嚟，衝刺相當凌厲，末段將Ask Edinburgh (岩田康誠)、Going to Sky (荻野極) 雙雙擒下，爆出25倍冷門。

星期日跑完日本盃之後，例牌有年長馬1200米三級賽京阪盃，「賢德之君」(西村淳也) 堂堂一級賽冠軍放棄香港多少有啲浪費，轉戰呢組要揹全場最重59公斤，直路上率先出頭，以為勝利在望之際，偏偏去到門前先比A T Makfi (富田曉) 偷襲成功；後者一直喺泥地短途浮沉多時，到頭來轉返草地先搵到出路，下年高松宮紀念可以留一席比佢。