【講番舊時】潘頓企得穩全靠薄奇能？ 原來潘頓有機會騎馬后！？

Homan

23 March 2023 at 8:40:04 am

前騎師薄奇能（Glen Boss）退休後，主力為外國博彩工作Ladbrokes擔任其賽馬頻道主持。早前潘頓返到澳洲出賽，期間薄奇能就搵佢做左個訪問。

薄奇能就話佢同潘頓當年一齊去到香港成為公司騎師，當時薄奇能就有一年牌照，而潘頓就只有半年牌照。潘頓當初成績唔算好好，並一度萌生去意，相信好多留意賽馬多年嘅朋友都知道。但原來潘頓之所以繼續留喺香港正正因為薄奇能。

除左薄奇能有出言勸佢留低之外，當時薄奇能與姚本輝合作減少，姚本輝轉問潘頓可唔可以幫佢策騎，結果兩人合作成績好好。而潘頓更加喺果一個月攞到10場頭馬，令佢增加留港嘅信心。佢話喺10個月嘅香港馬季，一個月贏10場馬，整季就可以贏到過百場頭馬，而香港馬季破百只有好少騎師做到。因此，佢決定留喺香港發展，亦都造就今日嘅潘頓。

潘頓亦喺訪問中講出一件往事，佢話自己曾經有機策騎馬后「雲絲仙子」（Winx）出賽，佢就話當時「雲絲仙子」於Sunshine Coast贏馬後，並轉到悉尼上陣。佢果一個賽日原本預約左「雲絲仙子」及為華禮納嘅其他賽駒出戰，但喺出發前一星期於試閘時被一匹賽駒踢中而骨折，令佢未能成行。最終「雲絲仙子」贏馬及另外四匹坐騎取得頭馬，意味著佢錯過左五場頭馬。當然佢潘頓就話自己都相信果場之後自己唔會繼續有得騎「雲絲仙子」，但放落CV到都幾靚仔。

翻查資料，潘頓應該係講緊2015年9月12號嘅玫瑰崗賽事，當時「雲絲仙子」喺出戰完Sunshine Coast賽事贏馬後，再贏多場先去玫瑰崗上陣。潘頓當時比「盈利駿馬」踢中而受傷，無得返去客串。而果一個賽馬日華禮納合共取得四場頭馬。

另外訪問仲提到韋達同潘頓當時爭冠嘅情況。兩人喺2012/13馬季鬥得難分難解，但潘頓季尾生腎石，結果表現有所影響下，最終比韋達反先成為冠軍。然後韋達就同潘頓講：「我最鍾意競爭，來吧！」之如此類嘅說話。當時嘅潘頓就覺得自己身體受影響唔算公平競爭。

於是之後一季佢公開表示自己會打低韋達成為冠軍。然後佢喺休季果陣，無論訓覺起身都諗點樣可以贏到冠軍騎師打低韋達。結果喺季初，潘頓已經表現好好，並成為當時歷史上最快五十場頭馬嘅騎師。然後佢不陣不時都會喺閘前笑下韋達，玩下心理戰：「下，你仲喺度呀？啲練馬師有冇比馬你呀？」韋達並無回應潘頓，只係黑面對住佢。最終潘頓喺果一季贏得冠軍騎師。

訪問傳送門：https://www.youtube.com/watch?v=vc4UL3Myw7k


Source: Ladbrokes.com.au Youtube
Photo: 訪問截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1