【20人大船出發】Black Olympia京都打開勝門
- 競馬知舍
- 1月28日
- 讀畢需時 2 分鐘
返嚟日本戰報，今期先睇POG比賽組2場賽事。
今個星期知舍POG出馬唔少，當中2駒喺京都報捷。先睇星期六未勝利2200米一組，4匹POG同場上陣，睇吓友道康夫馬房麾下「北部玄駒」子嗣、Sunday會一口馬Black Olympia (川田將雅)，可以話同香港有淵源，皆因外祖母同馬王「爪皇凌雨」為全兄妹，都吸引唔少人揀佢參戰；10月喺東京2000米新馬賽出道，同對手鬥到最後一兵一卒，影相輸埋，再轉戰京都千八，亦無功而回，今次增程上去，對呢啲大步均速馬好使好用，仲要17檔起步跟到第2位，發達啦！入到直路大大步咬上去，對住放頭對手話過就過，Matenro Origin (橫山典弘) 追上去看似有威脅，都係徒勞，末段越騎越有，以1 1/4馬位取勝，幫20個人賺590分。
至於星期日新馬內圈1600米一組，藤田晉名下、短途馬錦標盟主「妙發靈機」半弟，24年Select Sale週歲價3億日圓生嘅Pager，揀喺呢場出道就唔係原先所想：原定喺兩星期前同一組賽事初出，結果報名馬太多以致落選 (唔止香港四班塞車，日本新馬賽一樣有，呢個情況去到3歲初特別嚴重)；今仗以優先出賽權入選，鞍上人亦由川田將雅換成池添謙一，都算正確決定，點解？大家睇佢一拉出跑道，已經上晒口，拍得住當年「黃金巨匠」，去到真係落場，情況一樣，想留喺二疊有遮擋，轉個頭就搶口，變成走三疊望空，轉彎留到頭都側埋，去到直路先叫開始集中，池添一步一步砌落去，門前先將Avion (長岡禎仁) 擒下，幫Tony、Nathan、Lag及EricJai賺650分。Pager雖然勝出，但Tony對其走勢不太滿意，氣性問題幾嚴重，相信有排教，幕後放眼稍後中山賽事，換返川田將雅上去，川田你睇完今場，想問返你一句「你舞唔舞得掂㗎？」
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言