top of page
搜尋

【「嘉應高昇」大敵又添一員】「孫子」阪急盃大勝而回

  • 作家相片: 競馬知舍
    競馬知舍
  • 2月24日
  • 讀畢需時 2 分鐘

嚟到日本戰報第一節，睇吓年長馬賽事。


「嘉應高昇」18連勝，相當輕鬆，馬會PR識得花多少少心思搞活動，與馬迷同樂，亦算好事；不過Tony都認同有朋友話呢個世界嘅短途馬，唔係一味淨係識得佢，外地都仲有唔少好馬，今期即刻有一匹，星期六阪神1400米三級賽阪急盃，藤田晉名下，由沙德韋爾生產、2023年OBS Spring Sale Of Two-Year-Olds In Training 30萬美元 (約4020萬日圓) 生Sonshi (川田將雅)，跟得住快步速，入到直路抽出外檔，一踩油落去，如入無人之境，大勝3個半馬位不特止，更以1:18.9打破場地紀錄！此駒上年已經被寄予厚望喺短途接班，然而年初贏完一場淀短距離錦標 (表列賽)，再上試絲路錦標 (三級賽)，就喺賽前受傷退出，抖足13個月返嚟照樣交到超班表現，稍後高松宮紀念可以話擺下擂台。


同日東京上演3400米三級賽鑽石錦標，舊年有馬紀念賽前因為一單報名引起話題，木村哲也將未返馬房報到嘅「拯救者」同今期主角「杯進酒」(李慕華) 一齊報名，先用「拯救者」嘅投票排名，踢走「北島名花」，再將「拯救者」棄權，令「杯進酒」能夠憑獎金排名出賽；馬主方面當然唔認數，出篇聲明話無意參賽，事隔一排索性拉倉，轉去友道康夫麾下，借道今仗復出，不費吹灰之力，輕勝而回，為出戰春季天皇賞打下強心針；今年友道馬房出一對，除咗佢之外仲有「地球頌」，特別係「地球頌」有武豊加持，「拯救者」呢個前廐侶想冧莊都唔易！「祝福花環」(大野拓彌) 原先出戰月初一組3勝班2400米，因為大雪關係腰斬，改為上試兩哩兼越級挑戰，又有驚喜，直路逐步移出外檔，追回一席亞軍，稍後大長途賽事應該係目標所在；反而新勝長途馬錦標 (二級賽) 嘅「贊詠」(戶崎圭太)，直路發揮唔多順，先比「勇唱搖滾」(荻野極) 封位，再同抽出嚟嘅「祝福花環」撞一撞，戶崎腳踏都甩埋，最後100米成個人側晒，返嚟都仲有第5，以比人罰磅嘅馬女嚟講，表現都算不俗，去到春季天皇賞跑返平磅，仍有邊線機會。

星期日除咗有二月錦標之外，仲有1800米三級賽小倉大賞典，掛鞭前最後一次出戰重賞嘅藤岡佑介幾乎繼上星期「六月豪取」後連贏兩期，睇吓Keiai Sena，沿途快放之下，放到門前仍然未斷，以為食得出之際，被Tagano Dude後上擒下，亦為鞍上人古川吉洋贏到中央600W；Keiai Sena近期出戰細場表現較佳，POG揀咗佢嘅南總都話暑假過去函館搵食仲好。

Photo: 賽事截圖


==============================

Telegram公海：https://t.me/GoldRacing


 
 
 

留言

bottom of page