【一代名騎】騎師劉伯恩辭世享年85歲

競馬知舍
11月12日
讀畢需時 1 分鐘

英國騎師劉伯恩（Brian Rouse）日前於英國離世，享年85歲，佢曾經於香港客串及擔任見習騎師教練一段時間。

1940年出世嘅劉伯恩嘅騎師之路與大部分騎師不同，佢並非年紀輕輕就出道，反而佢因年輕時任電工，放棄成為見習騎師。其後佢喺二十幾歲先再次執起馬鞭，跨上馬背再次成為騎師。雖然起步較遲，但佢絕對係大器晚成，佢喺40歲先贏得佢第一個，亦都係唯一一個經典賽冠軍，以Quick As Lightning贏得英國一千堅尼。

之後佢策騎Stanerra贏得多項賽事，包括夏域錦標、1983年嘅愛爾蘭冠軍錦標前身Joe McGrath Memorial Stake及日本盃。而Stanerra亦都係劉伯恩策騎生涯入面最為人所知嘅一駒。

劉伯恩唔單止喺英國上陣，亦都會喺冬季期間來港客串，其中佢策騎簡炳墀訓練嘅「金中金」贏得1985年香港打吡大賽。佢亦都係練馬師鄭俊偉嘅好友，劉伯恩曾介紹鄭俊偉以見習騎師到英國學藝三年，其後鄭於1987年回港加入馬會。劉伯恩於1996年4月，佢因腳傷被逼結束騎師，隨後被香港賽馬會聘請協助見習騎師，兩年後佢離任，正式退休。