【兩個人一注中】兩場3歲預賽 都係POG世界
- 競馬知舍
- 6分钟前
- 讀畢需時 2 分鐘
嚟到日本戰報，今期一次過睇4場賽事。
星期六兩場重賞，首先睇阪神3歲馬女限定二級賽1400米報知盃雌馬賽，呢場出名年年爆冷收場，今年都唔例外，睇吓蘿蔔會一口馬Ghillies' Ball ，上場喺中山嘅仙女錦標 (三級賽) 中大敗而回，今場遠赴關西，配搭由李慕華換上西塚洸二，賽前跌磅，出閘唔夠人快，一路留喺馬群中後疊 (要知道阪神內圈唔利追)，咁多不利因素疊埋一齊，一樣食得出，直路一輪左穿右插，去到最後100米望空「飆」上去，即奠定勝局，爆出24倍冷門，成功出線櫻花賞，幫Pisa賺5200分；另外兩個櫻花賞出賽位就要影相分勝負，結果Saint Antoine (荻野極) 臨門一步追及I Need You (西村淳也)，一齊出線，Dea Veloce (酒井學) 啱啱影輸，正賽止步。
同日中山就有年長馬女限定三級賽1800米中山牝馬錦標，出道10年未贏過中央重賞嘅武藤雅終於憑老馬主高橋文男名下、父親武藤善則訓練嘅馬開齋，不過唔係用到家姐、歌手武藤彩未命名嘅「呼風女神」，而係呢匹「善戰女帝」，上場搵津村明秀做替工贏馬升班，今次更進一步，一眾實力份子包括「仙境艷后」(岩田望來)、「紅顏特急」(武豊)、「悅君意」(津村明秀) 全部捉佢唔到，連跑完今場退役嘅「深谷外」(菱田裕二) 都先過佢哋返嚟；「驍智嬌娃」(岩田康誠) 又一次變弱智，「橡木城」(李慕華) 轉倉初出有追勢，不過對大局冇威脅，兩駒諗吓早啲退役好過。
星期日中山上演3歲二級賽2000米彌生賞，四大熱門排隊返嚟，上年年尾脫出未勝利、絲綢會一口馬Basse Terre (川田將雅)，早段留喺尾二位置，轉入直路打「合法茅波」，撞開對手，面對東京體育盃2歲錦標 (二級賽) 季軍Reichsadler (佐佐木大輔) 同朝日盃未來錦標 (一級賽) 季軍Admire Quads (坂井瑠星)，一個箭步殺上去，輕鬆橫掃，幫史提夫賺5200分。Reichsadler又一次證明東京體育盃水準高，至於Admire Quads初跑二千末段有啲力不從心，去到皐月賞最多止於上名，睇吓會唔會一如同主「頌讚火星」落返一哩發展。
知舍POG仲有一駒報捷，星期六阪神未勝利2400米，藤田晉名下、2023年Select Sale當歲價5000萬生Cut Solo (坂井瑠星)，馬名同「青春永駐」一樣，都係用歌手AK-69嘅歌曲改名，今年2月先開上戰線，兩戰都上名之下，急急腳再出，沿途跟住第3位，直路沿內欄推進，同Namura Wunder (鮫島克駿) 單打獨鬥，佔盡上風，門前先擺脫對方，幫Gordon、Ramos、EricJai及Yan賺590分；Derma Fuji (濱中俊) 直路沿外檔衝一段，一度以為贏得，係上到斜路少少腳軟，末段追近少少，影相影贏個第2返嚟，表現幾吸引，且看稍後未勝利能否補中。
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言