【冬季客串】四歐洲好手來港客串過冬
香港賽馬會今日公布 11 月 至 2 月底嘅客串騎師名單，將會有四位歐洲騎師來港客串。
四位歐洲騎師分別係：
奧璇璧（2026 年 11 月 8 至 12 月 23 號）
紀仁安（2026 年 12 月 2 至 2027 年 2 月 8 號）
黎應揚（2026 年 12 月 2 至 2027 年 2 月 28 號）， 12 月 26 號賽日將缺陣
麥文堅（2027 年 1 月 6 至 2027 年 2 月 28 號）
其中法國騎師紀仁安及愛爾蘭冠軍騎師麥文堅去季都有來港客串，分別取得 15 場及 10 場頭馬，成績相當唔錯。同上季差唔多，前者就喺國際賽日前來港，後者就喺新一年先開始客串。紀仁安喺馬會訪問中表示如果今次客串可以攞到 10 至 12 場頭馬，成績就相當理想。
另外兩位歐洲好手，英國騎師奧璇璧及愛爾蘭籍騎師黎應揚將初次來港。現年 24 歲嘅奧璇璧今季出色表現有目共睹，兩星期前先憑「公路雄威」（Highwayman）攻下英國聖烈治錦標，成為英國賽馬史上第一位贏得經典賽嘅女騎師，將自己名字寫入史冊。呢位現時排喺英國騎師榜第八位嘅女騎師，早前更以隊長身份，為英愛隊贏得今屆識價盃隊際冠軍。
佢喺馬會訪問就表示好榮幸獲得邀請，非常期待呢個客串期。雖然佢未黎過香港，但自己有睇唔少香港嘅賽事，一直希望可以來港客串。過往佢曾到澳洲客串三個月，當時主要喺馬漢雅馬房客串，另外佢亦曾經喺杜拜世界盃嘉年華賽事上陣，並成為首位喺杜拜獲勝嘅女騎師。佢表示自己好幸運，可以去到唔同地方策騎，並認為每到一個新地方，都令佢學到更多新事物及成為一個更出色嘅騎師。
現年 26 歲嘅黎應揚於 2016 年開始其策騎生涯，2017 年轉到向禮倫門下任見習騎師，於 2018 取得英國見習騎師亞軍。2020 年轉到當時新設立嘅 Amo Racing 出任主帥，並策「魅幻星」（Mojo Star）兩度於一級賽跑獲亞軍。不過其後於 2022 年黎應揚與 Amo Racing 分道揚鑣。轉回自由身嘅佢喺於 2023/24 馬季贏得英國全天候賽事冠軍騎師。近年策騎水準一直保持穩定，亦開始取得一級賽頭馬，佢喺 2024 年策「才情麗驥」（Bluestocking）攻下多項一級賽，包括紅寶錦標及凱旋門大賽。今年佢喺英國雖然曾被罰未盡全力策騎，但穩定表現令佢可以暫時以 90 場頭馬排喺騎師榜第三位。
黎應揚喺馬會訪問中表示自己十分期待迎接今次挑戰，認為自己已經準備就緒，明白如何與其他對手競爭。佢認為今次來港客串，係佢第一次真正到其他地方發展及專注管理自己嘅體重同狀態，佢相信自己可以樂在其中並盡力做到最好。
Source: HKJC
Photo: HKJC
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言