【創歷史】「青春永駐」榮登日本2025年JRA年度代表馬

競馬知舍
1月6日
讀畢需時 2 分鐘

JRA今日公布日本2025年馬匹獎項名單，為日本取得首個美國育馬者盃經典大賽冠軍嘅「青春永駐」（Forever Young，フォーエバーヤング）榮登年度代表馬寶座，成為以泥地為主戰場嘅賽駒取得年度代表馬。

「青春永駐」今年先後於泥地1800米一級賽沙特盃及泥地2000米一級賽美國育馬者盃經典大賽贏馬而回，為日本代表寫下歷史。佢喺248個記者投票中，獲得226票，成為今年JRA年度代表馬。除首匹以泥地為主戰場嘅賽駒登頂外，亦都係自1999年「神鷹」（El Condor Pasa，エルコンドルパサー）以來，第二匹年內未有於JRA賽事上陣嘅賽駒，贏得年度代表馬殊榮。「青春永駐」以208票贏得最佳四歲或以上雄馬及以230票贏得最佳泥地馬獎。

其他獎項方面，最佳三歲雄馬由贏出有馬紀念賽嘅皐月賞冠軍「博物街」（Museum Mile，ミュージアムマイル）以213票贏得，櫻花賞及秋華賞冠軍「巧繡生花」（Embroidery，エンブロイダリー）就以246票贏得最佳三歲雌馬。最佳四歲或以上雌馬就由女皇伊利沙伯二世盃冠軍「蕾麗宮」（Regaleira，レガレイラ）以176票贏得。

以紀錄時間攻下日本盃冠軍嘅「格倫島」（Calandagan）就獲頒特別獎，同樣獲得特別獎仲有早前獲政府頒發黄綬褒章嘅57歲騎師橫山典弘。「格倫島」喺最佳四歲或以上雄馬投票中亦獲7票。

各獎項獲獎賽駒如下：

年度代表馬：「青春永駐」（226票）

最佳兩歲雄馬：Cavallerizzo（カヴァレリッツォ，190票）

最佳兩歲雌馬：Star Anise（スターアニス，247票）

最佳三歲雄馬：「博物街」（213票）

最佳三歲雌馬：「巧繡生花」（246票）

最佳四歲或以上雄馬：「青春永駐」（208票）

最佳四歲或以上雌馬：「蕾麗宮」（176票）

最佳短途馬：「里見夢境」（Satono Reve，サトノレーヴ，198票）

最佳一哩馬：「遠觀天象」（Jantar Mantar，ジャンタルマンタル，248票）

最佳泥地馬：「青春永駐」（230票）