【唔通魔咒靠佢打破】Going to Sky捧走青葉賞開入打吡
- 競馬知舍
- 4月30日
- 讀畢需時 2 分鐘
日本戰報第二節，轉睇3歲組賽事。
今個星期係三冠預賽週，兩場頭馬都係如月賞組參戰馬包辦，先睇星期六東京2400米二級賽青葉賞，Going to Sky (武豊) 轉戰呢組脫胎換骨，末段力拒Tidal Lock (三浦皇成) 來犯取勝，上原佑紀打吡叫夠四飛，Tidal Lock就幫Nathan同慧敏喺POG比賽賺2200分，打吡都係叫兩飛 (Nathan持有大船Audacia，慧敏一注獨中「天狼煌煌」)；再睇大熱門「豆豉鯪魚」Black Olympia (川田將雅)，上場贏1勝班Tony已經講緊佢毫無變速力，今場反映晒比大家睇，入到直路沿內檔追一段，落腳夠大步，加速方面就欠奉，結果跑入一席季軍，無緣正賽，等到夏季跑札幌2600米條線上菊花賞，更加似樣。
星期日東京上演馬女限定二級賽2000米花仙錦標，兩個客串中嘅澳洲騎師埋Q，喺如月賞後追不及獲季軍嘅Laughterlines換上連達文，同樣都係留後跑，不過去到直路階段，早早望空，唔怕追唔切，去到400米柱一推落去，交出不俗反應，末段擺脫Realize Luminous (松山弘平) 奠定勝局，Enne (戴文高) 臨門一腳踢走Realize Luminous，拎走橡樹大賽另一場入場券。
知舍POG比賽今期有2駒喺星期六報捷，首先係東京未勝利1400米，艇仔打爆大船，前田家名下Lilas (佐佐木大輔) 同Sunday會名下、名牝「放聲歡呼」第一胎Gran Maestro (李慕華)，同樣都係生涯第5戰，前者成功脫出未勝利，幫Yan賺590分；後者止於一席亞軍，幕後條氣唔多順，隨即部署兩星期後一組未勝利，睇吓可唔可以成功補中。
另一組京都1勝1800米溪蓀賞，6匹馬嘅場合，睇吓蘿蔔會一口馬Bullet Pass (西村淳也)，連跑兩場特別失利過後，喺呢組同Black Shalimar (吉村誠之助) 鬥足一條直路，末段力壓對方，幫Suzukaliu、達哥、Ben及阿積賺1140分，賽後幕後安排放牧，相信以暑期賽事為目標，喺比賽時段嚟講叫做任務完成。
4月賽事全部結束，知舍POG戰況請睇留言。
Photo: 賽事截圖
留言