top of page
搜尋

【國際賽報名馬】185駒報爭香港國際賽日

  • 作家相片: 競馬知舍
    競馬知舍
  • 10月30日
  • 讀畢需時 3 分鐘

香港國際賽日將會喺12月14號上演，四項一級賽將會上演。早前香港國際賽日嘅免費報名階段結束，馬會公布報名名單。


香港短途錦標方面，合共有36匹賽駒報名，當中有19匹外隊馬，17匹香港馬。比去年報名馬數目少15匹，其中外隊馬數目比去年報名時少14匹，或者大家都怕左「嘉應高昇」，呢匹香港馬王當然榜上有名，其他港隊代表仲有「驕陽明駒」、「金鑽貴人」及今季已三連勝嘅二級賽冠軍「好友心得」。


外隊馬就以「別具風味」（Lazzat）、「里見夢境」（Satono Reve）及一對Amo Racing賽駒「亞桑熾焰」（Arizona Blaze）及「滄海制霸」（Bucanero Fuerte）就較受注目。澳洲今年就得一匹報名馬，就係喺珠峰錦標敗於「嘉應高昇」蹄下嘅「天使資金」（Angel Capital）。



香港一哩錦標嘅報名馬數就同去年同期相若（2025：69、2024：64）。有趣嘅係，今年好多香港馬報跑一哩，去年報名時期多8匹，除左一啲跑開一哩嘅「遨遊氣泡」、「永遠美麗」及「祝願」等，仲有短途馬「金鑽貴人」。


外隊方面就以日本最多，暫時大機會黎嘅係上屆亞軍「神志勇進」（Soul Rush）同「遠觀天象」（Jantar Mantar）。其他外隊馬仲有「冬季獅」（The Lion In Winter）及澳洲代表「珍惜當下」（Treasurethe Moment）等。不過呢啲都要睇佢地跑埋美國或澳洲嘅大賽期後先知道會唔會黎。


比較有趣嘅係智利代表「大東方」（Gran Oriente），佢同時報左香港一哩錦標同香港盃。「大東方」今個星期六會出戰草地1600米一級賽育馬者盃一哩大賽，相信會視乎該仗結果再決定是否獲邀來港。該駒前往美國前先喺智利上演嘅一級賽Premio Club Hipico de Santiago贏馬，擊敗早前於拉丁美洲大賽取得亞軍嘅「名棗」（Medjool），至少於智利屬於頂級，唔知最後會唔會見到呢智利代表黎香港呢？



香港盃方面，今年有86駒報爭呢項全日最高獎金賽事，比去年多11匹。當中香港代表多達27匹報名馬，比去年多11匹。力爭四連霸嘅「浪漫勇士」當然有報名，另外報左香港一哩錦標嘅「遨遊氣泡」同「百賀飛駒」都有報名，後者預計會以香港盃為目標，並會交由潘頓操刀。


外隊方面，除「珍惜當下」外，同馬主嘅「精緻之道」（Via Sistina）都有報名。日本就有「北十字星」（Croix Du Nord）、「巧繡生花」（Embroidery）及「鍵琴高奏」（Tastiera）等一級賽冠軍都有報名。不過佢地會唔會出戰都要等多排先知，反而大阪盃冠軍「寶徠歌劇」（Bellagio Opera）特登唔跑秋季天皇賞，直指香港盃，相信佢最有機會黎香港。歐洲代表方面就有「格倫島」（Calandagan）、「南加名城」（Los Angeles）及「劇唱一姐」（Minie Hauk）等報名。前兩駒預計都會跑日本盃，「劇唱一姐」則等育馬者盃草地大賽先知，但相信三駒來港機會偏低。



香港瓶方面，今年報名馬同上年差唔多（2025：74、2024：78）。當中香港代表佔左11匹，有長途根據嘅「有目共賞」、「安騁」及「球星」都有報名。


外隊方面，幾匹墨爾本盃參賽馬都有報名，「實幹牛仔」（Buckaroo）、「川河陸駒」（Land Legend）、「聚星成河」（River Of Star）、「猛銳王」（Valiant King）、「班霸實力」（Al Riffa）及「高速發展」（Meydaan）等都有報名。當然仲有兩匹曾經喺香港贏2400米一級賽嘅「遠飛標槍」（Giavellotto）及「桀驁之戀」（Rebel’s Romance），前者已經確認會來港爭衛冕。日本代表方面，「北十字星」、「堅韌力」（Durezza）及日本打吡大賽亞軍「蒙面舞會」（Masquerade Ball）都有報名。



隨著國際賽臨近，應該會越黎越多賽駒會確認為來港，至於幾時入選名單就要等香港國際賽預賽日後先會公布，預計為11月下旬。


Source: HKJC

Photo: HKJC


==============================

Telegram公海：https://t.me/GoldRacing



留言

bottom of page