top of page
搜尋

【大船擊破標王】Zoroastro捧走如月賞

  • 作家相片: 競馬知舍
    競馬知舍
  • 2月12日
  • 讀畢需時 3 分鐘

已更新：2月19日

嚟到日本戰報第二節，再睇星期二東京同京都嘅補賽。


一場大雪，先令星期六東京最尾五場腰斬，再令星期日東京及京都賽事押後，原定星期一跑京都，星期二跑東京，又因為星期一繼續大雪，京都再押後舉行，星期二兩邊一齊跑，兩場重賞一次過同大家回顧。


先睇京都3歲限定1800米三級賽如月賞，POG參戰馬三方大戰，包括：


·       2024年Select Sale「標王」、5億9000萬身價馬M's Begin (川田將雅)

·       東京體育盃2歲錦標 (二級賽) 亞軍、Sunday會一口馬Zoroastro (韓新)

·       札幌2歲錦標 (三級賽) 冠軍Shonan Gulf (橫山和生)


飛數集中喺前兩者身上，Tony就一定係睇好M's Begin，6億身價殺聲震天，川田發揮亦無大錯，偏偏Zoroastro用到韓新，發揮如有神助，直路初打算抽出外檔，比M's Begin封住，見唔對路就抄入內檔，步步進逼，終點前先至出頭，幫12人賺4100分；M's Begin追足一條直路，最後一刻啱啱好捉到一早出頭嘅Choreo Sequence (濱中俊)，Tony等6人執返1600分，反而值得一提係全場唯一馬女、同屬關東Sunday會一口馬Laughterlines (藤岡佑介)，直路追勢如狼似虎之下，同M's Begin一齊到，只係影相影輸個第二，唔係起步慢一慢輸5個馬位出去，分分鐘贏得，至少過終點之後贏晒，稍後部署經典戰線，亦不容忽視。

 

東京就上演年長馬1600米三級賽東京新聞盃，「詩歌遊子」(李慕華) 贏完打吡公爵盃之後遊咗將近一年，泥地都遊埋，上場京都金盃終於叫輸唔遠 (泥地跑第3一役輸緊6個馬位)，今仗終於歸位；末段成棚馬鬥到群駒密攏返嚟，「艷紫芳馨」(岩田望來) 一步不蝕下追回亞席，「水之輝」(高杉吏麒) 全程拍住「詩歌遊子」，直路反應不及對方，末段先叫追近少少，熱完身應該會好啲，連近仗沉到落地核嘅「鑽彩」(岩田康誠) 都有第4，水準似乎唔係想像中咁高。

 

跟進賽事就睇吓東京4歲以上馬女限定3勝1800米初音錦標，原定阿聯酋總統到訪會改名，但係因故取消，用返原名開賽；初音通常後面接咩呀？梗係要接「未來」(ミク)，識玩之人年年一條正Q「3-9」(ミク)，今年終於開出，#3「日麗」(武豊) 同#9 「獨善丹心」(橫山武史) 包辦一口35倍冷Q；特別一提本身係POG參戰馬嘅前駒，貴為前年阪神2歲雌馬大賽季軍，上年因傷錯過雌馬三冠頭兩關，暑假復出之後表現一般，連秋華賞都抽選唔入，今仗比上仗重成70磅，照樣一放到底，表現復甦，升班之後再跑馬女限定賽可以留意；反觀櫻花賞季軍「毛茸茸」換上金美琪幫手，捧成全熱門，跟足四段，直路推落去一步都冇，三甲不入，相當失望。

 

知舍POG呢一日又有2駒報捷，先係東京馬女限定未勝利泥地1600米，睇吓Sunday會一口馬Tilbury (岩田望來)，全程望空唔使食沙，相當有利，雖然轉入直路前嗰段比對手撞一撞失位，不過入到直路一擺正堂軚，即交出強勁追勢，一口氣橫掃全場，幫Lag賺590分。

 

另一組係今期最後兩組3歲草地新馬賽之一，京都新馬內圈1600米，坂井瑠星原定跑完星期日賽事之後，同晚上機出發準備沙特盃賽日，結果賽事押後之下，等唔到補賽，今場座騎Elegance Ask易配川田將雅，沿途走來未受太大考驗，早段已經跟實第3位，去到直路頭川田稍作放行，率先透出，一鞭未開之下，拋離對手3個馬位而回，幫GE賺650分。

 

Photo: 賽事截圖


==============================

Telegram公海：https://t.me/GoldRacing

 
 
 

留言

bottom of page