【安祥離世】三冠雌馬「貴婦人」離世享年16歲

Sunday Racing 公布日本三冠雌馬「貴婦人」（Gentildonna，ジェンティルドンナ）於昨日離世。

Sunday Racing 表示「貴婦人」琴日安祥離世，享年16歲。生於2009年嘅「貴婦人」於2011年出道，三歲先後攻下櫻花賞、日本橡樹大賽及秋華賞。佢並以三歲馬身份挑戰日本盃，終點前力克另一三冠馬王「黃金巨匠」（Orfevre，オルフェーヴル）贏得日本盃。

轉歲後，佢先後出戰杜拜司馬經典賽、寶塚紀念賽及秋季天皇賞都未能獲勝，幕後換走岩田康誠，為其改配莫雅於日本爭衛冕，結果成功於日本盃二連霸。轉五歲，佢再次配上莫雅出戰杜拜司馬經典賽，今次佢終於取得海外一級賽勝仗。回國後表現未如理想，即使於日本盃重配莫雅都未能取勝。

最後一戰出戰有馬紀念賽，雖然初配戶崎圭太及初戰中山競馬場，但憑著檔位優勢，順利取得服役最後一場頭馬，成就有終之美。

退役後嘅「貴婦人」轉任配種雌馬，其子嗣一直成為焦點，雖然並非每匹子嗣都可以交出好成績，但最為人所知必定係2022年女皇伊利沙伯二世盃冠軍「吉典娜」（Geraldina，ジェラルディーナ）。

「貴婦人」今年及去年都未有接受配種，今年5月初，北方育馬場決定比佢從配種雌馬身份引退。去年出生，與「神威啟示」（Epiphaneia，エピファネイア）配合嘅雌馬為其最後一匹子嗣。

Source: sundaytc

Photo: 賽事截圖

==============================

最新文章