【年度最佳】「格倫島」榮登世界馬王香港其中11場一級賽入選百大

競馬知舍
1月21日
讀畢需時 2 分鐘

國際賽馬組織聯盟（IFHA）日前公布年度總結，經過調整評分後，「格倫島」（Calandagan）以130分榮登2025年度世界馬王，亦都係首匹閹馬登上馬王寶座。

「格倫島」2025年先後勝出四項一級賽，先於聖格盧大賽贏馬，再於接連攻下英皇錦標、英國冠軍錦標及日本盃。其英國冠軍錦標以兩又四分之一馬位擊敗128分嘅「監察官」（Ombudsman），令佢獲評130分，奠定其年度馬王嘅基礎。佢之後喺日本盃擊敗「蒙面舞會」（Masquerade Ball），亦令「蒙面舞會」年終獲評128分。

2025年共有5駒獲評128分，佢地都並列第二。分別係「嘉應高昇」、「蒙面舞會」、育馬者盃經典大賽盟主「青春永駐」（Forever Young）、朱德望國際錦標冠軍「監察官」及肯塔基打吡冠軍「管治權」（Sovereignty）。當中「嘉應高昇」為年內最高評分嘅短途馬王，亦都係歷來最高評分嘅香港賽駒。

佢地之後有3匹並列第七，同為127分，分別係凱旋門大賽冠軍「得令星」（Daryz）、沙特盃亞軍「浪漫勇士」（其127分為沙特盃評分）及「寶礦獅山」（Sierra Leone）。

百大一級賽方面，「格倫島」出戰嘅兩項一級賽英國冠軍錦標及日本盃同得126.25分，並列成為全球最高評分一級賽。百大一級賽會根據該一級賽頭四名賽駒嘅平均評分計算，日本繼2023年後，再一次為百大一級賽之首。三至五名分別為育馬者盃經典大賽（125.5分）、英皇錦標（125分）及杜拜司馬經典賽（124）。頭五名入面，其中四場都係「格倫島」有出戰嘅賽事。

最多一級賽入選嘅賽馬地區為英國，合共有20項一級賽，與去年相同。而去年最多一級賽入選嘅澳洲，就從30場下降至19場。有所增加嘅仲有美國、日本及香港，都增加二至五場不等。各地區數據如下：

地區—入選一級場數（比去年+-）

英國—20（0+)

澳洲—19（-11）

美國—16（+5）

日本—15（+2）

香港—11（+3）

法國—10（-1）

愛爾蘭—4（0）

阿聯酋—3（0）

德國—1（-3）

沙特阿拉伯—1（0）