【感到心碎】潘頓對「嘉應高昇」敗仗難以釋懷
「嘉應高昇」上星期六於珠峰錦標被終止其連勝走勢，將連勝紀錄止於 21 場。不少馬迷、網民，無論身處何地，都有質疑潘頓嘅策騎方式。潘頓直言未有睇過有關評論，亦對此不以為然。但佢就話對「嘉應高昇」珠峰錦標嘅敗仗感到心碎及難以釋懷，認為會令佢心痛一段時間。
潘頓今日再次就「嘉應高昇」嘅敗仗接受澳洲傳媒 SEN 嘅訪問，佢喺訪問之初就表示就落敗感到心碎，同時亦稱讚對手「動心」（Tempted），認為該駒出色且展現出多變嘅跑法。佢認為排檔差劣影響發揮，末段雖然走勢良好，但出彎時一度失平衡。
佢解釋佢未有預計咁多對手會喺起步後主動搶放，令賽事形勢變得相當複雜。佢認為自己於見到咁多馬搶放後，稍留至適當位置判斷正確，指出自己需要比坐騎有足夠爭勝機會。事實上，佢覺得自己作出正確決定，因為坐騎於末段能夠交出良好走勢，跑出一場唔錯嘅賽事。佢稱讚坐騎展現出無比鬥心同勇氣，認為未能追越「動心」獲勝係相當可惜，如果佢能夠抽到一個唔同嘅檔位，賽果將有所不同。
雖然後上對「嘉應高昇」而言並不算陌生，而且於蘭域馬場角逐的話，當時所處位置並非一個差劣嘅位置。但係佢認為「嘉應高昇」喺蘭域馬場角逐時，於轉入直路時會稍為失平衡，令佢要再攞番正再衝刺，亦因為咁表現有所影響。另外，據 Racenet 嘅訪問，潘頓指出若非「冰斗陡壁」（Headwall）於直路上喺「嘉應高昇」外側激發「嘉應高昇」鬥心嘅話，「嘉應高昇」或許未能及時反撲上前，最終或許只得第七或八名。
潘頓表示知道其該陣上跑法受到批評，但佢表示對此不以為然。佢就話自己無睇到果啲評論，認為佢地鍾意點講都無問題，因為佢根本唔會在意。
按原定計劃，「嘉應高昇」會乘搭琴日由馬會安排嘅私人飛機飛往香港。希斯接受傳媒訪問時表示下一仗為 11 月馬會短途錦標，再以 12 月香港短途錦標為目標。至於會否再次遠征珠峰錦標，希斯就表示要視乎狀態，當然佢好希望再次回到澳洲挑戰。
Source: SEN, Racenet
Photo: Racenet
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言