【戰鬥吧浪漫勇士】有馬紀念賽冠軍「博物街」避戰杜拜轉以女皇盃為目標

雖然有部分日本賽駒喺3月11號入檢疫營，準備遠征杜拜世界盃賽馬日。不過近日陸續有日本賽駒決定放棄遠征，除上星期「野田分位」（Danon Decile，ダノンデサイル）外，今日亦有「博物街」（Museum Mile，ミュージアムマイル）。

Sunday Racing 公布原本預定會出戰杜拜草地大賽嘅「博物街」，將會避戰杜拜草地大賽，並會從檢疫營直接轉到位於滋賀嘅Northern Farm外廄放草保持狀態。早前該有馬紀念賽冠軍已有報名四月底一級賽女皇盃，幕後決定讓該駒以該2000米一級賽為目標。

上周五嘅美丹賽事，一度因為空襲警報，而需停止賽事30分鐘。再加上有消息指，近日JRA向馬主發信勸籲佢地慎重考慮是否遠征杜拜。或許因此，唔少未出發嘅日本代表都接連決定放棄遠征杜拜。

繼早前「蒙面舞會」（Masquerade Ball，マスカレードボール）後，再有一匹避戰杜拜嘅日本賽駒決定遠征香港。加上歐洲代表，香港瓶冠軍「同工之妙」（Sosie），今年女皇盃相信會相當精彩，「浪漫勇士」要第四次贏得女皇盃都唔容易。

Source: サンケイスポーツ

Photo: 賽事截圖

==============================

最新文章