【日蝕大獎】美國賽馬年度總結「管治權」榮登美國馬王

競馬知舍
1月23日
讀畢需時 2 分鐘

美國馬壇年度大獎——日蝕大獎今日頒發，三歲賽駒「管治權」（Sovereignty）贏得今年美國馬王寶座。而「青春永駐」（Forever Young，フォーエバーヤング）成為第二匹於日蝕大獎中獲獎嘅日本代表。

「管治權」去年六戰五勝，攻下三項一級賽，包括三冠系列其中兩關——肯塔基打吡及貝蒙錦標。雖然佢因為發燒未能令佢出戰育馬者經典大賽，但年內統治級表現，已足以令佢登上美國馬王寶座。喺220票中，佢獲得201票，佔總票數約91%。

來年佢將會繼續服役，預計會以杜拜世界盃為年初目標。「管治權」同時贏得最佳三歲雄馬，而其馬主兼育馬者高多芬集團則獲2025年美國最佳馬主及最佳育馬者獎。練馬師莫特（Bill Mott）亦成為年度最佳練馬師。

日本代表「青春永駐」雖然於馬王選舉中只得17票，未能問鼎馬王，但佢仍然以127票成為最佳泥地年長雄馬。呢個亦都係繼「唯獨愛你」（Loves Only You，ラヴズオンリーユー）於2021年獲最佳草地雌馬獎後，再一匹獲獎嘅日本代表。而「青春永駐」贏得育馬者經典大賽嘅一刻就獲頒2025年美國馬壇最佳時刻。

騎師方面，柏列特（Flavien Prat）成為去年美國最佳騎師，佢全年取得309場頭馬，其坐騎所獲獎金達4000萬美元。最佳見習騎師就由Pietro Moran贏得，呢位主力喺加拿大策騎嘅騎師，全年取得140場頭馬，更策Mansetti贏得當地大賽King's Plate Stakes。

各項獎項得獎者如下：

最佳兩歲雄馬：Ted Noffey

最佳兩歲雌馬：Super Corredora

最佳三歲雄馬：「管治權」

最佳三歲雌馬：Nitrogen

最佳泥地年長雄馬：「青春永駐」

最佳泥地年長雌馬：Thorpedo Anna

最佳短途雄馬：「全部拿下」（Book’em Danno）

最佳短途雌馬：「紫蘇辣妹」（Shisospicy）

最佳草地年長雄馬：「名演說」（Notable Speech）

最佳草地年長雌馬：「自信最美」（She Feels Pretty）