【晉身世一】「格倫島」登全球馬匹排行榜頭位英國冠軍錦標暫列百大一級賽之首

歐洲各項大賽完結，全球馬匹排行榜日前更新，出現新一匹榜首賽駒。

直至上一期為止，「監察官」（Ombudsman）一直喺首位，但上月佢喺英國冠軍錦標敗於「格倫島」（Calandagan）蹄下。「格倫島」評分因此上調至130分，暫時居於榜首。「監察官」評分則未有變動，仍然企喺128分。

並列第三有四匹，分別係凱旋門大賽冠軍「得令星」（Daryz）、愛爾蘭二千堅尼冠軍「遍地金」（Field of Gold）、育馬者盃經典大賽冠軍「青春永駐」（Forever Young）及卓華斯錦標冠軍「管治權」（Sovereignty），佢地同得127分。

香港馬王「嘉應高昇」贏完珠峰錦標後，分數未有改變，依然係126分。考慮到11月30號結算日前已經無短途一級賽，相信佢會喺今年全球最高分短途馬。與之並列仲有香港馬王「浪漫勇士」喺沙特盃攞到嘅126分及愛爾蘭冠軍錦標冠軍「懾人巨作」（Delacroix）。

百大一級賽方面，現時英國冠軍錦標預計會排喺首位，其次會係英皇錦標，全因130分嘅「格倫島」有出戰呢項賽事，且都能跑入前四名（全球百大一級賽計算賽事前四名的馬匹平均評分）。現時只餘一哩冠軍賽及日本盃尚未上演，全球馬匹排行榜之首「格倫島」會出戰，未知會否影響最終排位。

Source: IFHA

Photo: Aga Khan Studs

==============================

最新文章