【暗示參與投注】南非騎師麥都華釘牌五年其中三年緩刑執行

競馬知舍
2分钟前
讀畢需時 2 分鐘

南非騎師麥都華（Luyolo Mxothwa）於當地取得接近800場頭馬，亦曾策「史納比」（Make It Snappy）贏得一級賽。佢早前被控違反當地賽馬規例，被即時停賽直至審訊完結。日前其案件已審結，南非賽馬會判麥都華釘牌五年。如麥都華肯配合南非馬會開出之條件，其中三年釘牌將緩刑執行。

案情指麥都華喺去年12月底或1月初錄音比不知名人士（Noor Iqbal或Zahir Ali），當中談及佢會出戰嘅1月2號頭場賽事。

佢當時咁講：「我唔太熟悉我喺果場騎嘅馬，如果呢隻係我熟悉嘅馬，我會好容易就確定佢可唔可以贏。但你都知呢隻係新馬，而且呢場賽事水準好低。但我同其他練馬師傾過，佢話傑奇果隻馬會贏。所以我地去馬（暗示要投注），睇下點啦，一齊做好件事佢，之後再傾。」

（“The thing is I don’t know the horse, if it was a horse I knew, then I would confirm easy. You know, and it’s a new horse, it’s a bad field but I spoke to the trainer of the other horse, they said Zackey will win the race. So let’s have a go, let’s see what happens. Ja, so let’s do it. Chat later.”）

之後傑奇策騎嘅Champagne Problems以1.61倍大熱獲勝，而麥都華策騎嘅賽駒就以第六名完成賽事。呢段錄音流出後，麥都華被指違反當地賽馬規例72.1.12及72.1.19條，即禁止不正確地向他人透露馬匹操練、試閘等資訊及禁止任何人從事及串謀於賽馬作出貪污、欺詐及不誠實等行為。由於作出此行為，以致佢違反72.1.26條，即禁止影響公眾對賽馬的形象。

麥都華當時被即時停賽並展開聆訊，最終佢選擇認罪，南非賽馬會決定罰其釘牌五年，其中若麥都華肯配合南非馬會開出之條件，當中三年會係緩刑。

條件如下：

麥都華於緩刑期間不得涉及任何賽馬誠信及導致賽馬聲譽受損嘅行為；

麥都華需於判刑30日內就其行為發聲明致歉；麥都華需透過媒體警告所有騎師，若有人接觸其他騎師索取非公開嘅賽事資訊，佢地必須上報；

麥都華需於復出前24個月內繳交5萬南非蘭特（約2.3萬港元）；

麥都華需於14日內向南非馬會提交書面報告，將佢所有知道與當地馬壇被禁止、非法或不當行為有關嘅資訊上報，包括博彩公司、投注人士等與他接觸嘅紀錄。如果麥都華無任何資訊披露，佢需宣誓確認這點。

暫未知麥都華會否全面配合。

Source: NHRA

Photo: Wayne Marks

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍