top of page
搜尋

【有晒路程根據信得過】「我的領域」捧走日經賞

  • 作家相片: 競馬知舍
    競馬知舍
  • 3月31日
  • 讀畢需時 2 分鐘

嚟到日本戰報第一節，先睇古馬組賽事。


星期六中山上演2500米二級賽日經賞，一對條件賽上位份子，一內一外，碾壓一眾公開組中堅，橫山典弘早前憑「我的領域」贏出中央3000W，3001W都係佢，排住15檔，你以為佢擺前走，佢一於留前鬥後，直路拉到出去啤酒園，再推落去，輕鬆橫掃全場；Mikuni Inspire (丹內祐次) 本身路有專長，今仗排1檔，貼住內欄一步不蝕下，跑入一席亞軍，亦算不俗，「利森名園」(李慕華) 去完香港之後一洗頹風，事隔年幾再次上名，只係要奉勸幕後：唔好再跑讓磅賽，讓唔起㗎！反而「宇宙雨林」(橫山武史) 大熱倒灶，小休一排姐，咁快散功？

星期日跑高松宮紀念之前，中山就有1800米泥地三級賽三月錦標，連續三期都有騎師喺重賞開齋，今次輪到角田大和，睇吓Sunday Funday，向來雙彎千八最耍家，上年贏完東海錦標過後，直落二月錦標 (一級賽)，一轉單彎千六就影都冇，今年即使喺子犬座錦標上名，都唔去二月錦標，留返呢組讓磅賽出擊，順利得手，連帶接手一年嘅練馬師東田明士都首勝重賞。


精選賽事就睇星期日阪神4歲以上3勝2400米御堂筋錦標，大熱落喺早一輪轉播賽見過嘅「熱唱滿谷」(菱田裕二) 身上，加埋Bettles (岩田望來)、「飆風王」(松本大輝)、「弧度多姿」(古川吉洋) 等實績份子，形成混戰格局，不過全部都衰喺Gamble Room (幸英明) 手上，喺「飆風王」前面快放之下，留得相當順暢，直路等到前列對手燒得七七八八，自己仲有兩腳殺上嚟「執雞」，以2:23.2破場地紀錄，成功升班。

Photo: 賽事截圖


==============================

Telegram公海：https://t.me/GoldRacing


 
 
 

留言

bottom of page