【杜拜世界盃】美國及日本皆有代表放棄遠征杜拜 亦有代表如期預備
- 競馬知舍
- 38分钟前
- 讀畢需時 3 分鐘
騎師田泰安、練馬師蘇偉賢及馬會隨隊人員陸續從杜拜返港，阿聯酋與香港兩地航班亦逐步恢復。當地局勢依然緊張，部分有意遠征賽駒亦因當地局勢未明而決定放棄遠征月尾嘅杜拜世界盃。
杜拜賽馬會表示今個星期五嘅賽事會如期上演，另外杜拜世界盃都唔會受影響。但部分仍未出發嘅賽駒就決定先放棄遠征。美國代表預計會喺3月14日出發，前往杜拜作最後備戰。現時去年美國最佳短途賽駒「全部拿下」（Book'em Danno）決定避戰杜拜金莎軒錦標，其馬主之一Jay Briscione表示響應美國國務院呼籲唔好前往衝突地區，「全部拿下」將會轉戰美國國內其他短途賽。
不過又唔係所有美國代表都決定放棄出戰，兩匹杜拜世界盃參賽馬Magnitude及上屆冠軍「大熱劇目」（Hit Show）都會如期出發，另外育馬者盃短途錦標盟主「歡迎再來」（Bentornato）亦都會如期出發，備戰杜拜金莎軒錦標。
日本方面，多匹未出發賽駒都宣布放棄遠征杜拜。最先公布嘅係社台雙雄，日本盃亞軍「蒙面舞會」（Masquerade Ball，マスカレードボール）與去年JRA最佳一哩馬「遠觀天象」（Jantar Mantar，ジャンタルマンタル）決定放棄遠征杜拜，前者會轉戰四月初嘅大阪盃，後者則會先放草，以四月底於香港上演嘅一級賽冠軍一哩賽為目標。
之後二月錦標亞軍「盈寶威神」（Wilson Tesoro，ウィルソンテソーロ）及短途馬錦標冠軍「紅瑪瑙」（Win Carnelian，ウインカーネリアン）都放棄遠征，兩駒分別會以日本一級賽柏市紀念賽及三月底嘅短途一級賽高松宮紀念賽為目標。另外地方賽駒「宙斯山洞」（Diktaean，ディクテオン）亦決定一旦要留喺日本，會改以日本一級賽川崎紀念賽為目標。
就並非所有日本代表都決定放棄遠征，有馬紀念賽冠軍「博物街」（Museum Mile，ミュージアムマイル）幕後決定繼續預備遠征杜拜草地大賽，如無意外將會喺3月18號上機起行。不過都有話如果未能出戰，佢地會考慮留喺日本出戰大阪盃或遠征香港出戰一級賽女皇盃。另外同樣都會出戰杜拜草地大賽嘅仲有「地神力」（Gaia Force，ガイアフォース），其廄侶「賢德之君」（Lugal，ルガル）都仍備戰阿喬斯短途錦標。兩駒嘅練馬師杉山晴紀就表示現時仍會按遠征方向調整賽駒狀態，視乎當地形勢再決定是否成行。帝王賞冠軍Mikki Fight（ミッキーファイト）就仍然按原定計劃部署杜拜世界盃，練馬師田中博康同樣表示會睇形勢再決定是否起行。
日本外務省今日對阿聯酋、科威特、沙特阿拉伯東部、巴林、卡塔爾及阿曼發布第三級警告，即勸籲國民唔好飛往相關地區（渡航中止勧告），相信會影響未有離開當地的日本代表遠征。另外，鞍上人嘅問題亦都需要解決，如果勸籲持續至月底，相信都會影響日本騎師飛往當地上陣。最大影響相信係仍在當地備戰嘅沙特盃冠軍「青春永駐」（Forever Young，フォーエバーヤング），唔少人都關注坂井瑠星能否飛往當地執韁，「青春永駐」最終會否出賽。
Source: Sanspo
Photo: Dubai Racing Club
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing