【現實版The Royal Family】日高町飛野牧場相隔七年再產出一級賽馬冠軍
- 競馬知舍
- 5小时前
- 讀畢需時 2 分鐘
上星期日今村聖奈完成任務，策Juryoku Pierrot於直路上左串右插後上攻下日本橡樹大賽，盡顯冷靜，成為JRA史上首位攻下一級賽嘅女騎師。賽後自己都謙虛地講：「平時轉入直路身處呢個位，前面唔會有空位上前，但今日就前面嘅馬就自動打開空位比我地上前，當時心諗一切都好順利。」賽後全日本各媒體，報紙、電視及網上都係遍布今村聖奈嘅報導。
值得祝賀除左今村聖奈之外，佢師父練馬師寺島良及馬主近藤健介同樣都值得祝賀。兩人都係初嚐一級賽勝利。佢地願意信任近況低迷但對Juryoku Pierrot相當熟悉嘅今村聖奈，讓其策騎出戰日本橡樹大賽，實屬難得。Juryoku Pierrot係馬主近藤健介第二匹個人名義養嘅馬，該駒早前已報爭凱旋門大賽，練馬師寺島良表示會與馬主商討後再決定會否遠征法國。
另外，培育Juryoku Pierrot嘅飛野牧場都值得祝賀。位於苫小牧日高町嘅飛野牧場並非大型牧場。有留意開日本馬嘅朋友都知道，日本最大型嘅牧場係位於安平町嘅北方育馬場（Northern Farm），除左大賽常見嘅一口馬主團體馬外，亦有唔少個人馬主喺Select Sales購入嘅馬匹都係來自北方育馬場。位於日高嘅飛野牧場嘅代表飛野正昭雖然年輕時與社台嘅吉田善哉關係唔錯，但飛野牧場嘅規模絕對難與北方育馬場相比。
飛野牧場現時大約飼養26匹馬，有配種雌馬同時都有剛出世嘅幼駒。飛野牧場每年大約會產出10匹馬，產量少加上細牧場資源有限，要培育要有一匹能夠贏得級際賽嘅賽駒已經相當困難。同日劇The Royal Family一樣，Royal Hope及Royal Family都係由日高細牧場培育。不過今次並非飛野牧場初嘗一級賽勝利，過往該牧場曾憑「名父巴魯」（Roger Barows，ロジャーバローズ）取得日本打吡大賽，亦都係少數可以培養出日本打吡大賽及日本橡樹大賽冠軍嘅牧場。佢地嘅產駒雖然有少部分都會獲批可以於Select Sales拍賣，但有部分都要等馬主上門選購，而Juryoku Pierrot係其中之一。
飛野牧場代表，現年82歲嘅飛野正昭表示原本以為Juryoku Pierrot會追唔上，終點前心臟就好似要跳出黎咁。佢回想起Juryoku Pierrot出世時只係一匹身型普通嘅馬，但就相當聰明。佢感謝練馬師及育成牧場協助培育呢匹雌馬，令佢可以贏得一級賽。
日劇The Royal Family中，地方騎師佐木隆二郎因為Royal Hope投考JRA騎師牌照，最終合格踏上前列騎師路途。今村聖奈今季嘅成績未盡如意，Juryoku Pierrot能否成為佢嘅Royal Hope助其谷底反彈仍屬未知數。不過，Juryoku Pierrot會願意繼續為呢位22歲嘅年輕騎師開路，繼續步向高峰。
Source: スポニチ、tospo-keiba
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言