【經典組合再現】「地球頌」阪神大賞典大勝
- 競馬知舍
- 3月25日
- 讀畢需時 2 分鐘
返嚟日本戰報第一節，先睇古馬組賽事。
星期日兩場重賞，先睇中京馬女限定1400米三級賽愛知盃，幾年前「紅線情牽」喺幸英明胯下爆冷贏出女皇伊利沙伯二世盃 (一級賽)，今年同主加同一騎師就有全妹Ai Sansan接力，上年曾經出戰橡樹大賽，其後落返條件賽，轉戰一哩，先後贏過三場，今仗轉至新練馬師橋田宜長麾下初出，排18檔起步，比佢泊車咁泊入內欄自己放，末段受Salt Queen (富田曉) 上前挑戰，後者幾乎出頭嘅時候，又谷返上嚟，爆出27倍冷門，橋田開齋兼首勝重賞。
同日阪神上演3000米二級賽阪神大賞典，上年日本盃吉馬先過世界馬王「格倫島」過終點嘅「地球頌」復出，跑大長途用返武豊，對比川田將雅始終都係技高一籌，轉入直路順利出頭，如入無人之境，大勝3個馬位，武豊9勝此賽平紀錄之餘，亦繼續保持出道至今年年有級際賽頭馬紀錄；再望一望時間，3:02.0，打破場地紀錄，以呢個狀態放落正賽，可以話擺下擂台！川田自己就揀騎Danon Cima，明顯長力唔夠，末段趁其餘對手洩氣，「執死雞」攞返第3而已，論馬之前都有講，跑返2000至2400最好。
精選場次就睇同日中山4歲以上3勝1800米，睇吓早一輪轉播賽亮相過嘅「愛兒」(津村明秀)，嗰場用到馬昆跑個「梗頸四」，隨即匆匆再出，喺一組中山2200米賽事補中，幕後見到跑中山表現特佳，所以贏完比佢休息一輪，等到中山賽期再出擊，升班第一場就初跑草地千八，明顯唔係射程範圍，一樣得手，直路一推落去，輕鬆拋甩對手，再下一城，成功升班，稍後再部署中山賽事，可以繼續留意。
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言