【被逼退出】「國民樂派」未能通過獸檢退出覺士盾及墨爾本盃

考菲爾德盃聽日上演，為11月初墨爾本盃嘅一場重要指標賽事。雖然木下錦標兼東寶錦標冠軍「國民樂派」（Sir Delius）未有出戰考菲爾德盃，但今日成為澳洲媒體焦點之一。

「國民樂派」喺今個澳洲馬季表現出色，先後喺木下錦標及東寶錦標兩項一級賽奪冠而回，成為覺士盾及墨爾本盃嘅熱門之一。呢匹前古摩亞賽駒於去年凱旋門大賽後轉到澳洲上陣，喺活侯夫人及布特訓練下，好快就適應到當地環境，並交出好成績。

原本以為「國民樂派」可以乘勢挑戰兩項澳洲好重要嘅一級賽，不過維省馬會今日公布，「國民樂派」未能通過覺士盾及墨爾本盃嘅賽前獸醫檢查，勒令佢退出兩項賽事。消息指佢早前進行兩項大賽例行賽前獸醫檢查，經來自澳洲、英國及美國嘅獨立獸醫小組睇左相關掃描影像後，認為該賽駒目前受傷風險較高，建議該駒退出。

活侯夫人及布特團隊得知後，星期四再安排該駒接受正電子發射斷層掃描（PET Scan），以釋除維省馬會嘅疑慮。不過最後得出嘅結果顯示該駒目前受傷風險較高，無奈之下只好退出賽事。

活侯夫人及布特暫時未有公布該駒會否再喺年內上陣，因為兩次檢查都顯示該駒受傷風險較高。不過如果該駒未能出覺士盾及墨爾本盃，又想年內再上陣嘅話，日本盃相信會喺其選擇之一，畢竟該駒幕後早前已為佢報爭日本盃。

Source: Racenet, @RVStewards

Photo: Racenet

==============================

最新文章