【轉唔轉播都爆】「乘天風」袋返張泥地經典賽入場券
- 競馬知舍
- 8月12日
- 讀畢需時 3 分鐘
返嚟日本戰報，今期同大家睇7場賽事。
星期六札幌有泥地1700米三級賽榆樹錦標，上場喺函館一放到底大勝嘅「想做就做」(舟山瑠泉) 打算重施故技，不過今次遇到對手玩中段變奏嚟個攬炒，跑完大半程都要舉手投降；遠征組包辦三甲，「樂蜀茶座」(岩田望來) 去完中東之後回國首仗揀安田紀念，明顯志在熱身，今期回師泥地，級數碾壓全場，結果輕勝而回，「法境小鎮」(佐佐木大輔) 跑開北海道表現例牌好，只係撞正高一班嘅「樂蜀茶座」都要俯首稱臣，T O Password (松山弘平) 彎位開始跟「樂蜀茶座」一齊踩油，末段稍為追近，表現絕不失禮；上年泥地二冠馬Natural Rise (橫山武史) 早段又係比嚴重搶口呢個老毛病影響，跑過半程之後先上力，末段趁對手腳軟先收回一席第4，叫做交咗今年最佳表現，不過都再一次證明上年泥地三冠組對住年長馬實力係有明顯差距。
星期日新潟上演3歲限定泥地1800米三級賽獵豹錦標，去完杜拜嘅「赤火術師」(岩田望來) 同麒麟錦標亞軍 Mercantour (坂井瑠星) 都借今場復出，爭一個泥地三冠尾關日本泥地經典賽 (表列賽) 出線位，兩駒全程鬥得相當激烈，連主宰步速嘅Don Erectus (荻野極) 都招架不住，入到直路「赤火術師」佔盡上風，以為食得出之際，比「乘天風」(吉村誠之助) 後上一網打盡，爆出20倍冷門；「乘天風」喺4月大阪盃賽日1勝班曾經亮相，當時喺一度出頭之下比「銀比例」反勝，後者其後贏出麒麟錦標同東京打吡跑入亞軍，足證此賽水準之高，如今「乘天風」亦成功出線，且看去到10月會師大井又能否反先一回。
同日中京1200米三級賽CBC賞，上年Tony睇好有力贏到「嘉應高昇」嘅「父威無匹」(團野大成) 力爭衛冕，奈何去完美國一轉，至今未復舊觀，快放兩段過後，直路上急速轉弱；森秀行同藤田晉一齊扶助弱勢社群，出道15年都未贏過級際賽嘅中井裕二憑「日入而始」一嘗捧盃滋味，不過呢組形勢詭異，特別係前段超快步速之下，對後上馬毫無幫助，二至五名無一交出全場最快三個末段返嚟，水準似乎唔算太高。
今期跟進賽事有兩場，先睇星期日新潟3歲以上3勝1800米，皐月賞季軍「鷹之徽紋」落班復出，初對年長馬捧成全熱門，佐佐木大輔唔同你搏命等幾時，直路「打茅波」阻到對手都要拎個空位推進，末段力壓「三伏天」(杉原誠人)，成功升班，事後罰停賽兩個禮拜，又有乜所謂，正所謂「頭馬已袋，理得你」！練馬師上原佑紀就話一哩左右最啱發揮，似乎秋季部署一哩冠軍賽會係唔錯選擇。
知舍POG方面，古馬組有四駒有頭馬進賬，其中星期日札幌主題賽事草地1200米UHB賞，大熱門落在Namura Clara (濱中俊) 身上，早段留守馬群中後段，轉彎入直路以為被圍困之際，前方剛好打開一個缺口衝上，最後200米逢馬過馬勝出，取得第四場頭馬。Namura Clara為「奈村佳盈」的半妹，雖然也是跑短途賽為主，但戰績沒有家姐穩定，依練馬師長谷川浩大之言，應會乘勢挑戰兩星期後的堅蘭盃。
至於比賽組，今期有兩駒報捷，星期日新潟的草地內圈2000米未勝利賽，La Garriga (坂井瑠星) 早早守住內欄第四靚位，直路望空趕過Scia Lunare (戶崎圭太) 勝出，並且以2分正打破場地紀錄，為六位玩家贏得590分。La Garriga六月出道戰留後兼走大外檔最終落第而回，今仗用上前置跑法立即獲勝，接下來9月的芙蓉錦標或10月的常春藤錦標都是射程範圍內。
同日中京雌馬限定草地1600米新馬賽，Jason名下的Les Nuages (松山弘平) 由頭帶到尾，以半個馬位擊敗川田將雅的大熱門Lienfini，賺得780分。Les Nuages父系「鐵鳥翱天」今個星期大豐收，合共取得五場頭馬，同父馬以往印象是適合跑更長路程，此駒初出贏一哩可以有所期待。
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言