【轉戰盛裝舞步】「金鎗六十」下星期出戰日本退役馬馬術賽

香港馬王「金鎗六十」現時於北海道北國優駿公園頤養天年，除左放草嘆世界之外，「金鎗六十」不時都會喺園內做下運動。日本傳媒報導，「金鎗六十」將會出席日本退役馬馬術賽引退競走馬盃（Retired Racehorse Cup，RRC）。

日本為左支援退役馬嘅第二馬生，都會舉辦唔同類型嘅馬術大賽比退役賽駒參與，引退馬競走馬盃係其中一個大型賽事，允許於日本各地嘅退役馬參加。當中北國優駿公園係賽事嘅其中一輪。「金鎗六十」將會出席9月28號喺北國優駿公園嘅引退競走馬盃，佢將會出戰馬場馬術部分，亦即盛裝舞步賽。

今屆係引退競走馬盃首度允許外國退役賽駒出賽，而「金鎗六十」將會係第一匹出戰嘅外國退役賽駒。傳媒引述知情人士表示佢地一直都想「金鎗六十」出席呢類賽事，咁啱引退馬競走馬盃今年起可以允許外國退役賽駒出戰，所以就安排佢出賽。

之前何澤堯就話曾經到歐洲為「金鎗六十」添置馬術用嘅馬鞍比「金鎗六十」，仲喺暑假果陣為佢試左個馬鞍，效果理想。何澤堯9月28號應該就去唔到北海道策「金鎗六十」出席引退競走馬盃架喇，暫時正式參賽名單就未公布，未知邊個會為呢匹香港馬王操刀。

如果「金鎗六十」順利於9月底嘅盛裝舞步賽獲得頭兩名，將會可以晉級到12月7號喺JRA馬事公苑舉行嘅引退競走馬盃決賽。

Source: sanspo

Photo: HKJC

==============================

最新文章