【難以養妻活兒】日本騎師宮崎北斗退休 專注自身公司發展
- 競馬知舍
- 9月26日
- 讀畢需時 2 分鐘
日本唔少騎師退落黎後，大部分都會轉任騎馬人或向練馬師方向發展，當然亦有少部分轉為評馬人，而現年36歲嘅宮崎北斗就揀左一條較少人行嘅路。
宮崎北斗於2007年出道，同期同學包括濱中俊、丸田恭介及早前墮馬離世嘅藤岡康太等，佢出道後雖然都有啲支持，更於2009年單年取得37場頭馬。不過好景不常，喺2012年贏得超過100場頭馬後，無左減磅嘅佢就開始缺乏支持，頭馬亦跌到得番單位數字。
2013年至2024年期間，佢除左喺2018年頭馬數字達雙位數字外，其餘年份都只係得單位數字頭馬，去年仲更加得兩場頭馬。成績不振加上欠缺支持嘅惡性循環，連上陣次數都開始減少，收入亦都大幅減少。今年一月佢曾表示自己如果只靠騎師嘅收入，佢每月只得10萬日圓（約5200港元），屋企除左老婆仲有三個小朋友要養，唔搵其他方法搵錢，根本唔能夠生存。
日本騎師收入來源來自四方面，首先當然係獎金，騎師可獲賽駒所得獎金嘅百分之五。另外，每次出戰平地賽，騎師可獲2萬至6萬日圓不等嘅策騎費，跳欄則為7至14萬日圓，視乎佢地出戰嘅賽事級別而定。如果騎師隸屬某練馬師，上陣亦可以額外薪酬。如果騎師屬自由身，不隸屬任何練馬師嘅話，每次於晨操為練馬師策馬出試就可獲晨操策騎費，每次大約數千日圓（如3000日圓的話，則約155港元）。
以宮崎北斗去年嘅成績為例，佢全年上陣47次，獲兩冠一季。佢嘅坐騎合共取得2155萬日圓，即佢可獲獎金108萬日圓，策騎費合共大約可獲200萬日圓，全年總收入為308萬日圓（約16萬港元），相當於每個月人工兩萬港元。當然呢個數仲未計算佢為其他馬房晨操，不過佢每日可以喺晨操策騎嘅賽駒並不多，所得收入都唔太高。
初中畢業就入讀騎校，宮崎北斗直言除賽馬以外就無任何技能。直至佢喺一次墮馬意外後，意外認識神經生物學，然後佢就多次遠赴美國認識呢門科學，將之應用到運動當中，同時開設中心為一啲痛症或移動不便嘅患者治療。宮崎從私人Trainer到而家擁有自己公司，公司所得收入亦成為佢而家主要收入來源。
宮崎北斗於退休嘅訪問中表示認為既然而家已經有一間公司，都係適當時候發展自己嘅事業。同時亦都指出佢喺馬圈嘅經驗十分寶貴，感謝喺馬圈遇到嘅每一位。
佢會喺今個星期上陣後正式退休，佢喺星期六及日都喺中山競馬場各策一駒上陣，希望佢之後一切順利。
Source: JRA, Umatoku
Photo: カラダマニアちゃんねる影片截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言